Dagur: Megum ekki gera of mikið úr þessum sigri

Þýska landsliðið í handbolta, undir stjórn Dags Sigurðssonar, stóð uppi sem sigurvegari á Supercup-mótinu sem fram fór um helgina, en það er árlegt æfingamót.

Þjóðverjar unnu sannfærandi sigra á Serbíu, 37-26, og Brasilíu, 29-20, áður en Slóvenar voru lagðir að velli, 31-28, í úrslitaleik mótsins. Þýskaland og Slóvenía eru saman í riðli á EM í Póllandi.

„Fyrst og fremst spiluðum við þrjá góða leiki sem er jákvætt. En við þurfum að bæta leik okkar ef við ætlum að vinna eitthvað í Póllandi,“ segir Dagur í viðtali við Handball-World um mótið.

„Við höfðum það forskot að vera á heimavelli. Leikurinn gegn Slóveníu í Póllandi verður allt öðruvísi. Þess vegna megum við ekki gera of mikið úr þessum sigri. Svo var Slóvenía líka að hvíla menn.“

Þetta var líklega í síðasta sinn sem Supercup-mótið verður haldið í núverandi mynd, en áhuginn á því þykir ekki nógu mikill. Ríflega 4.500 manns mættu á leikinn í Kiel, 3.000 í Flensburg og tæplega 4.000 í Hamburg.

„Ég er jákvæður fyrir þessu samt sem áður og er þakklátur fólkinu sem kom á leikina. Mér er sama hvort nafni mótsins eða hvað verður gert, þessir leikir eru okkur nauðsynlegir,“ segir Dagur Sigurðsson.

Þýskaland er í mjög sterkum riðli á EM, en auk lærisveina dags og Slóveníu eru í riðlinum Spánverjar og Svíar.