Sagði handrukkara hafa stolið áfenginu sem átti að borga aðflutningsgjöldin

Hendrik Björn Hermannsson var í dag dæmdur í Héraðsdómi Reykjavíkur til 12 mánaða fangelsisvistar fyrir fjárdrátt í tengslum við innflutning af 7.224 0,7 lítra flöskum af 37,5% sterku áfengi.

Halldór Leví Björnsson, sem einnig var ákærður af sérstökum saksóknara fyrir aðild sína að málinu, var hins vegar sýknaður vegna þess að ekki tókst að sanna hlutdeild hans að málinu en þeir neituðu báðir sök fyrir héraðsdómi.

Hendrik er annar eigandi Players og var árið 2008 dæmdur til að greiða 77 milljóna króna sekt vegna svika á vörslusköttum

Kom sér hjá greiðslu aðflutningsgjalda

Halldóri og Hendrik var gefið að sök að hafa með blekkingum fengið greiðslufrest á 26 milljóna króna kröfu embættis Tollstjóra. Þeir hafi nýtt sér heimild félagsins Valís ehf. til að fá frest á greiðslu aðflutningsgjalda þar sem félagið uppfyllti skilyrði laga um slíkt þar sem Valís hafi verið skuldlaus við ríkissjóð og áður flutt áfengi til landsins.

Samkvæmt ákærunni pantaði Halldór vínflöskurnar sjö þúsund frá Bretlandi í gegnum félagið Vínheima, sem Halldór á, í mars árið 2012. Fyrir þær hafi verið greitt með fjármunum frá Hendriki. Í ákærunni er Halldór sagður hafa vitað eða hafi hlotið að vita að áfengið yrði ekki nýtt í þágu Vínheima.

Sjá einnig: Ákærðir fyrir fjárdrátt vegna innflutnings á sjö þúsund flöskum af sterku áfengi

Þann 12. apríl er Halldór sagður hafa farið fram á að pöntunin yrði færð yfir á félagið Valís, hjá breska vínsalanum. Hann hafi svo sent Eimskipum, sem flutti áfengið til landsins, reikning þann 17. apríl þar sem Valís var skráður kaupandi áfengisins. Fyrr um daginn hafði Halldór keypt allt hlutafé í Valís á 360 þúsund krónur.

Eftir að áfengið var komi til landsins er Hendrik seldi áfengið í eigin þágu til veitingastaða auk þess að hafa látið Halldór fá hluta áfengisins án þess að greitt væri fyrir. Því hafi ekkert af andvirði áfengisins runnið til Valís eða upp í skuld félagsins við Tollstjóra vegna aðflutningsgjalda.

Handrukkar þvældust fyrir

Fyrir dómi sagði Hendrik að á tíma brotsins hafi hann verið á ná sér upp eftir „erfitt líf,“ eins og það er orðað í dómi hérðasdóms. Hann hafi haft marga á eftir sér sem gert hafi tilkall til stórs hluta þess áfengis sem hann flutti inn. Þá sagði Hendrik vera handrukkara sem komist höfðu á snoðir um innflutninginn. Þeir hafi hótað honum og fjölskyldu hans öllu illu þannig að Hendrik hafi ekki þorað að kæra þá til lögreglu.

Svo óttasleginn væri hann ennþá að hann treysti sér ekki til að gefa upp nöfn þeirra fyrir dómi, eða í lögregluskýrslu. Að sögn Hendriks tóku handrukkararnir stóran hluta lagersins þannig að ekkert hafi verið eftir til að standa straum af greiðslu aðflutningsgjalda sem alltaf hafði staðið til að gera – „en allt hafi þetta gerst mjög hratt,“ eins og það er orðað. „Allt hafi farið í vaskinn við það að áfengið hafi verið tekið frá honum.“

Hendrik ítrekaði fyrir dómi að Halldór hafi ekki haft neinn fjárhagslegan ávinning af innflutningunum. Hann hafi einungis aðstoðað hann við innflutninginn með því að benda honum á fyrirtæki sem væri á lausu til að hefja innflutning í gegnum. Þá aðstoðaði hann Henrik við að panta áfengi að utan og nýtti til þess viðskiptasambönd sín við enska fyrirtækið. Þeim félögum bar þó ekki saman um hvort Halldór hafi fengið nokkrar vínflöskur fyrir ómakið, svokallað „smakk“ eins og það er orðað í dómnum. 

Dæmdur fyrir fjárdrátt en fjársvik ósönnuð

Í niðurstöðum dómsins er tekið fram að ekkert hafi komið fram sem sýndi með óyggjandi hætti að ákærðu hafi fyrirfram tekið ákvörðun um að flytja inn umrætt áfengi og greiða ekki af því lögbundin aðflutningsgjöld. Því hafi þeir félagar báðir verið sýknaðir af ákæru um fjársvik.

Hins vegar lá fyrir að Hendrik Björn viðurkenndi að hafa selt hluta af áfenginu og hafi söluandvirðið runnið í eigin vasa hans. Í niðurstöðunum segir að Hendriki hafi á engan hátt tekist að styðja með með gögnum eða framburðum þá staðhæfingu sína að handrukkarar hafi tekið áfengið. „Þegar allt framangreint er virt er sannað að ákærði Hendrik Björn hafi dregið sér umrætt áfengi, sem hann hafði í vörslum sínum og ráðstafað í eigin þágu,“ segir í niðurstöðunum og því hafi Hendrik verið sakfelldur fyrir fjárdrátt sem fyrr segir.