Árás í Svíþjóð: Kennari og ellefu ára drengur látnir

Lögreglan í Trollhattan í Svíþjóð skaut í morgun grímuklæddan árásarmann sem réðst inn í skóla í borginni vopnaður hnífum og sverði.

Þetta er það sem við vitum um árásina. Ítarlegri umfjöllun er fyrir neðan punktana.

• Skólinn sem um ræðir heitir Kronan og í honum eru börn frá leikskólaaldri upp í unglingadeild.
• Lögregla fékk tilkynningu klukkan 10.10 á staðartíma.
• Einn karlmaður var látinn þegar lögreglu bar að garði. Hann var kennari við skólann.
• Tveir eru alvarlega slasaðir og gengust undir skurðaðgerð. Það voru fullorðinn maður og fimmtán ára drengur. Klukkan 12.30 bárust þær fregnir að ellefu ára drengur sem áður var talinn meðal slasaðra hefði látist af sárum sínum.
• Árásarmaðurinn er á þrítugsaldri. Hann var vopnaður sverði og grímuklæddur. Hann var skotinn af lögreglumönnum og lést af sárum sínum á sjúkrahúsi.
• Árásin átti sér stað í mötuneyti skólans en skólinn hefur verið gagnrýndur fyrir öryggismál, meðal annars að mötuneytið sé opið almenningi alla daga en sé ekki einungis fyrir nemendur.

Uppfært 16:06:

Árásarmaðurinn lést af sárum sínum á sjúkrahúsi en lögregla skaut á manninn á vettvangi. Hann var 21 árs.

Uppfært 13.32:

The Local, sænskur fréttamiðill sem flytur fréttir á ensku, hefur eftir nemendum við skólann að árásarmaðurinn hafi komið á staðinn með Star Wars grímu og með stórt sverð og því hafi nemendur talið að um brandara væri að ræða. Hann var með hnífa auk sverðsins.

Uppfært 13.19:

Skóla við hlið Kronen, Stavre skóla, var hótað í gær að því er fram kemur á SVT. Nemendum skólans var sagt að mæta ekki til skóla í dag en lögregla vissi ekki af hótuninni. Því hefur lögregla nú hafið eftirlit með Stavre skóla. 



Uppfært 12.45:

Auglýst er eftir blóðgjöfum á svæðinu vegna hnífaárásarinnar þar sem fórnarlömb hafa misst mikið af blóði og óttast er að ekki sé til nógu mikið af birgðum. Blóðgjafar eru hvattir til þess að fara á spítalann.

Árásarmaðurinn var búsettur í Trollhatten en lögregla veit enn ekki hvað honum gekk til með árásinni. Hann var skotinn af lögreglu í neðri hluta brjóstkassa þegar hann réðst gegn lögreglu.

Uppfært 12:30:

Lögregluyfirvöld hafa gefið út að árásarmaðurinn er 21 árs gamall. Ekki verða veittar frekari upplýsingar frá embættinu að svo stöddu.

Aftonbladet greinir frá því að annar drengjanna sem gengust undir skurðaðgerð eftir árásina hafi ekki lifað af. Sá var aðeins ellefu ára gamall.

Uppfært 12.00:

Löfven forsætisráðherra segir þetta svartan dag í sögu Svíþjóðar. Hann hefur breytt dagskrá sinni til þess að geta haldið til Tollhattan í dag. „Hugsanir mínar eru hjá fórnarlömbunum og fjölskyldum þeirra, nemendum og starfsmönnum skólans og hjá samfélaginu í heild. Engin orð geta lýst því hvað það er sem þau ganga í gegnum núna. Við finnum til með þeim og við verðum að tryggja að þau fái allan þann stuðning sem þau þurfa.“

Uppfært 11.56:

Lögregla veit hver maðurinn er en þó er ekki vitað hvaða tengingu, ef nokkra, hann hefur við skólann. Lögregla mun framkvæma húsleit hjá honum í dag. Þetta kemur fram hjá Aftonbladet.

Uppfært 11.45:

Foreldrar barna í skólanum fréttu af árásinni í fjölmiðlum og í gegnum vini og kunningja. Ekki gafst tími til þess að hafa samband. Þá fengu börnin takmarkaðar upplýsingar um hvers vegna þeim var sagt að halda kyrru fyrir í skólastofum. Einn faðir segist í miklu uppnámi, hann hafi frétt af árásinni frá nágranna sínum þegar hann fór út með ruslið og keyrði beint á staðinn. Þá sá hann dóttur sína veifa út um gluggann, hún var hrædd og skildi ekki hvað var að gerast.

Uppfært kl. 11.20:

Maðurinn sem réðst inn í skóla í Trollhattan er á þrítugsaldri. Frá þessu greinir SVT.

Uppfært kl. 10.56:

Forsætisráðherra Stefan Löfven fer til Trollhattan síðdegis í dag vegna árásarinnar á skólann.

Nú hefur foreldrum verið gefið leyfi til þess að fara með börn sín heim en þeim er nú hleypt út um bakdyr skólans.

Lögregla kom inn um framhlið skólans í morgun þegar hún kom á vettvang.

Uppfært kl. 10.45:

Hinir slösuðu eru sagðir illa haldnir og þrjú þeirra gangast nú undir aðgerð, þar mun vera um að ræða annan kennara auk tveggja nemenda sem eru ellefu og fimmtán ára gamlir.

Samkvæmt heimasíðu skólans eru nemendur hans allt frá leikskólaaldri upp í níunda bekk, sem þekkist sem tíundi bekkur hér á landi. Í skólanum er einnig bókasafn, borgaraleg þjónusta, menningartengd starfsemi og önnur afþreying.

Uppfært kl. 10.37:

Skólinn, Kronan, hefur áður verið til vandræða samkvæmt viðmælanda SVT. Málið hefur í raun verið pólitískt hitamál þar sem margir hafa haldið því fram að kaffitería sem opinn er almenningi alla daga ætti ekki að vera til staðar heldur öruggt mötuneyti fyrir krakkana í skólanum.

Skólayfirvöld hafa áður verið gagnrýnd fyrir að öryggismálum sé ábótavant.

Uppfært kl. 10.30:

TV4 lýsir ringulreiðinni sem ríkir á skólalóðinni en bæði börn og fullorðnir gráta, ættingjar bíða fyrir utan skólann og enn eru börn inni í skólastofum sem banka á gluggana til þess að vekja athygli fullorðinna sem standa fyrir utan.

SVT greinir frá því að manneskjan sem látin er hafi verið kennari í skólanum.

Lögregla rannsakar nú bakgrunn árásarmannsins en hún hefur lýst því yfir að engin hætta sé lengur til staðar við skólann.

Uppfært kl. 10.23:

Eins og gefur að skilja ríkti töluverð ringulreið eftir að atvikið átti sér stað og voru bæði ungir nemendur og þeir sem eldri eru í uppnámi.

Uppfært kl. 10.17:

Árásarmaðurinn hefur verið fluttur á sjúkrahús. „Við neyddumst til þess að grípa til vopna, hann hefur verið skotinn, ég veit ekki hversu slasaður hann er,“ sagði Stefan Gustavsson í samtali við SVT. „Hann er alvarlega slasaður og gengst nú undir aðgerð,“ sagði Niklas Claessen upplýsingafulltrúi bráðamóttöku.

Lögregla skoðar nú vettvang gaumgæfilega til þess að tryggja að enginn annar hafi slasast í árásinni.

Uppfært kl. 10.12:

Guardian greinir frá því að um fjórir nemendur séu meðal hinna slösuðu og einn fullorðinn.

Trollhattan er nálægt Gautaborg í vesturhluta Svíþjóðar. Skólinn sem um ræðir heitir Kronan og í honum er um fjögur hundruð nemendur. Atvikið átti sér stað nálægt kaffiteríu skólans og sáust nemendur flýja af vettvangi.

Hér má fylgjast með beinni útsendingu í sænskum miðlum þar sem rætt er um árásina.