Tafir á nýrri geimferðamiðstöð gera Pútín reiðan

Vladimir Pútín forseti Rússland er ósáttur við hversu illa gengur að klára nýja geimferðamiðstöð Rússlands. Fjárdráttur og spilling undirverktaka er sögð vera ástæða fjögurra mánuða frestunar á því að miðstöðin verði starfhæf.

Pútín gagnrýndi sérstaklega Roscosmos, geimferðastofnun Rússlands. Segir hann að ekki hafi verið vandað til verka við val á verktökum og að sjá megi fjölmarga byggingagalla á geimferðamiðstöðinni. Hefur hann sagt að hann ætlist til þess að miðstöðin verði tilbúin fyrir fyrsta geimskotið sem áætlað er að muni eiga sér stað í apríl á næsta ári.

Þrír undirverktakar við verkið hafa verið ákærðir fyrir fjárdrátt grunaðir um að hafa dregið sér fé að upphæð einni milljón dollara hver en í vor liðu mánuðir áður en verkamenn við framkvæmdirnar fengu greitt. Það var ekki fyrr en Pútín skarst í leikinn að greiðsla barst.

Vostochny-geimferðamiðstöðin er staðsett í austur-Rússlandi nálægt landamærum Rússlands og Kína. Með byggingu geimferðamiðstöðarinnar munu Rússar eignast sína eigin miðstöð fyrir mannaðar geimferðir en nú leigja þeir Baikonur-miðstöðina sem staðsett er í Kazakstan. Hún var byggð á tímum Sovétríkjanna og hefur verið miðstöð geimferða Rússa en þeir hafa hinsvegar leigt hana af yfirvöldum í Kazakstan.