Sjáið landsleik Íslands og Frakklands hér

„Eftir mjög erfiða leiki á þriðjudaginn gegn Noregi, Belgíu og Bosníu og Hersegóvínu þar sem að við náðum því miður bara einum sigri í hús, þá er komið að þessu,“ segir Ólafur Nils Sigurðsson þjálfari íslenska landsliðsins í Counter-Strike eða CS, og helsti sérfræðingur Vísis í þessari tölvuleikjaíþrótt.

Nú fer að hefjast landsleikur Íslands og Frakklands, leikurinn hefst 15:30 og eru lesendur Vísis hvattir til að fylgjast með í gáttinni sem birtist hér fyrir neðan. Þeir sem lýsa leiknum eru þeir Rúnar Nielsen og Tómas Jóhannsson.

En, til að hita upp er Ólafur Nils beðinn um að fara aðeins yfir gang mála, en Íslendingar eru að keppast um að komast í úrslitakeppni Heimsmeistaramótsins í Counter-Strike.

Mikil eftirvænting ríkir víða og til að mynda mun hópur manna koma saman og fylgjast með leiknum á stórum skjá í Stúdentakjallaranum.

Kafsigldu Bosníu og Hersegóvínu

„Já, við byrjuðum hrikalega illa gegn Noregi og liðið komst aldrei á flug. En, það þýddi ekkert að hengja haus. Við tókum léttan krísufund og ræddum hvað hafði farið úrskeiðis og hvað við þyrftum að gera betur.  Stuttu eftir Noregsleikinn mættum við Bosníu og Hersegóvínu og þeir sáu aldrei til sólar. Íslenska liðið gjörsamlega kafsigldi þá og við unnum frekar þægilegan sigur þar. Seinasti leikurinn var gegn Belgum sem eru með nokkuð sterkt lið og við mættum inn í þann leik með góðan meðbyr frá leiknum á undan og höfðum sigurinn í hendi okkur, en gerðum því miður nokkur dýrkeypt mistök og töpuðum niður forskotinu og seinna meir leiknum.“

Þrátt fyrir brösótt gengi þá komst Ísland uppúr riðlinum sem var einn sá sterkasti af fjórum riðlunum.

„En vegna þess að við rétt komumst inn þá mætum við efsta liðinu úr riðli B, sem er landslið Frakklands. Þeir eru sennilega eitt af 4 landsliðunum sem eru hvað líklegust til að vinna Heimsmeistaramótið svo að okkur bíður gríðarlega stórt verk í dag, núna verða hinsvegar spilað svokallað „best af þremur“ , þar sem að bæði lið fá að velja sér keppnisvöll/borð og svo ef að það er jafnt eftir fyrstu tvo leikina er valið eitt að lokum að handahófi.“

Líkur gegn okkar mönnum

Ólafur Nils segir strákana vel stemmda fyrir leikinn gegn Frakklandi þrátt fyrir að flestar veðmálasíður verði líklegast með 90 prósenta líkur á sigri Frakklands, jafnvel hærri.

„Við höfum samt það með okkur að Frakkarnir munu mögulega vanmeta íslenska liðið, og við vitum vel að við eigum alveg möguleika á að sigra þá ef að við spilum vel, en það er ekkert pláss fyrir mistök og við verðum að vera gríðarlega einbeittir.“

Þessi leikur skiptir öllu, ef að við sigrum þá hefur liðið tryggt sér þáttökurétt á lokamótinu. „Og þá munum við fljúga út til Serbíu í næstu viku, þetta er 100 prósent stærsti kappleikur Íslandssögunnar í Counter-Strike og ég hvet alla til að horfa á útsendinguna og styðja við strákana okkar!“ segir Ólafur Nils sem sjálfur er nötrandi af hreinni og ómengaðri eftirvæntingu.