Flugmiðar til Frakklands rjúka út

Íslendingar eru augljóslega spenntir fyrir Evrópumótinu í knattspyrnu sem haldið verður í Frakklandi næsta sumar. Eins og öllum er væntanlega ljóst tryggði íslenska karlalandsliðið sér farseðilinn þangað í gær með jafntefli við lið Kasakstan. Þeir eru þó ekki þeir einu sem tryggt hafa sér flugmiða til Frakklands en talsmenn WOW air og Icelandair segja að flugfélögin finni fyrir miklum áhuga á miðum til Frakklands í júní og júlí á næsta sumri.

Aukning í sölu hjá WOW air

Lokamótið hefst þann 10. júní og lýkur mánuði síðar, eða þann 10. júlí. Mótið fer fram víðsvegar um Frakkland í 10 borgum, allt frá Lille í norðri til Marseille í suðri. Svanhvít Friðriksdóttir, upplýsingafulltrúi WOW air segir að sala á miðum til Frakklands næsta sumar hafi aukist eftir leikinn í gær og að WOW air muni líklega bæta við ferðum verði þörf á því.

„Við sjáum að það er aukning á sölu á flugmiðum til Parísar í júní á næsta ári eftir leikinn í gær.“ Svanhvít segir að það sé augljóst að mikill áhugi sé á íslenska karlandsliðinu um þessar mundir. „Það er augljóslega mikill áhugi. Ég get bara nefnt sem dæmi leikinn í Amsterdam við Hollendinga í síðustu viku. Það seldist fljótt upp í þá ferð hjá okkur þannig að við bættum við 200 sæta vél og við fylltum hana mjög fljótt.“

Icelandair finnur fyrir auknum áhuga

Sömu sögu er að segja hjá Icelandair en Guðjón Arngrímsson, upplýsingafulltrúi Icelandair, segir að áhuginn á miðum til Frakklands næsta sumar hafi aukist jafnt og þétt.

„Frá því að möguleikinn á því að Ísland kæmist á EM varð að alvöru höfum við fundið fyrir og skynjað áhugann á því að komast til Frakklands næsta sumar.“ Segir Guðjón að Icelandair muni mjög líklega bæta við ferðum til þess að koma Íslendingum og öðrum fótboltaáhugamönnum til Frakklands næsta sumar.

„Við vitum auðvitað ekki hvar leikið verður en við munum gera okkar til þess að anna eftirspurninni og sjá til þess að Íslendingar komist á leikina með einum og öðrum hætti.“