H&M gæti verið á leiðinni til landsins

Helgi S. Gunnarsson, framkvæmdastjóri fasteignafélagsins Regins, segir í farvegi að laða að heimsþekkt vörumerki í verslunarrými sem fyrirhuguð eru á Hörpureitnum. Reginn keypti sig inn á Hörpureitinn og vinna ráðgjafar fyrirtækisins að því að kynna þá möguleika sem eru fyrir hendi. Frá þessu er greint í Morgunblaðinu.

„Það gera þeir á sýningum víða um heiminn og meðal þeirra aðila sem þeir munu ræða við er að sjálfsögðu H&M, sem þeir hafa einmitt starfað töluvert með á síðustu árum,“ segir Helgi. Hann segir Reginn þó vera í samtali við fleiri stóra aðila og allur markaðurinn sé í skoðun.

Áhugi Íslendinga á sænsku fatakeðjunni er afar mikill. Fréttir af mögulegri komu keðjunnar til Íslands undanfarin ára hafa vakið mikla athygli þótt ekkert hafi orðið af því enn sem komið er. 

Á dögunum var stofnaður Fésbókarhópur þar sem tilkynnt var að H&M verslun yrði opnuð í desember. Ekki reyndist fótur fyrir því en fleiri þúsund manns gengu í Fésbókarhópinn og reyndu að vinna sér inn gjafabréf.