Ekkert verður af risarennibraut á Skólavörðustígnum í sumar

Ekkert verður af því í sumar að risavatnsrennibraut verði komið fyrir á Skólavörðustíg eins og áætlað var. Ekki náðist að flytja rennibrautina inn til landsins í tíma.

„Við runnum út á tíma,“ segir Jökull Torfason einn þeirra sem stóð í upphafi að rennibrautinni. Hópurinn samanstóð af sex nemum í Háskólanum í Reykjavík en auk Jökuls stóðu Brynja Rut Blöndal, Bryndís Ósk Valdimarsdóttir, Elín Lind Jónsdóttir, Jóhannes Hilmarsson og Klara Ingvarsdóttir hópinn.

„Kúrsinn sem við gerðum þetta í hófst ekki fyrr en í maí og það vannst bara ekki tími til að ná þessu.“

„Þetta er frábært verkefni hjá nemunum og við settum okkur í samband við þau er við sáum verkefnið á vefnum,“ segir Guðmundur Arnar Guðmundsson, markaðsstjóri NOVA. Flytja átti rennibrautina inn frá Asíu en hún tafðist í Hollandi og náði ekki alla leið.

„Það var tekið mjög vel í þetta hjá Reykjavíkurborg ásamt öllum sem við töluðum við á leiðinni. Það vildu allir greiða götu okkar. Það er leitt að geta ekki boðið upp á þetta í ár því því verkefnið er afar skemmtilegt,“ segir Guðmundur og bætir við að það sé líklegra en ekki að þetta verði að ári.

„Við verðum að bíða og sjá til.“