Írar rísa undan skugga fortíðar með sögulegri atkvæðagreiðslu

Yfirgnæfandi meirihluti Íra samþykkti í fyrstu þjóðaratkvæðagreiðslu sinnar tegundar að breyta stjórnarskrá landsins þannig að samkynhneigðir geti gengið í hjónaband. En samkynhneigð var ólögleg í landinu allt fram til ársins 1993.

Kaþólska kirkjan og viðhorf hennar til samkynhneigðar hefur ráðið miku á Írlandi alla tíð, en fjöldi hneykslismála í þátíð og nútíð innan kirkjunnar hefur dregið mjög úr áhrifum hennar. Atkvæði í þjóðaratkvæðagreiðslunni voru talin í dag.

Aodhan O'Riordain dóms- og jafnréttismálaráðherra Írlands segir að skilaðboð almennings í landinu gætu vart verið skýrari eftir að tveir þriðju hluti kjósenda sagði já við hjónabandi samkynhneigðra.

„Ég er mjög stoltur af því að vera Íri í dag. Þetta hefur verið mikið tilfinningaferðalag fyrir það fólk sem hefur beitt sé í þessari umræðu. Gríðarlega margar persónulegar sögur hafa verið sagðar í herbergjum og sölum út um allt land og á öldum ljósvakans. Ég held að þessari þróun verði aldrei snúið við. Við höfum gefið afgerandi yfirlýsingu um það sem við trúum á,“ segir O'Riordain.

Um tíma leit út fyrir að mjótt yrði á munum í þjóðaratkvæðagreiðslunni en kannanir sýndu líka að úrslitin myndu ráðast mikið af þátttöku yngstu kjósendanna en kjörsókn var mjög góð.

„Þetta eru mikilvæg skilaboð í fyrstu þjóðaratkvæðagreiðslu í heimi um þessi mál til umheimsins. Þetta er gríðarlega sterk yfirlýsing sem styðst ekki við nauman meirihluta heldur yfirgnæfandi meirihluta,“ segir O'Riordain.

Allir stjórnmálaflokkar landsins studdu tillöguna og þar var Sinn Féin engin undantekning.

„Þetta hefur verið dásamleg herferð að taka þátt í. Fólk var spennt, hugsjónasamt, hamingjusamt og mjög jákvætt. Ég tel að þetta sé stór dagur fyrir jafnréttið,“ segir Gerry Adamns leiðtogi flokksins.

Breyting viðhorfa í þessum efnum er mjög mikil á Írlandi miðað við sögu landsins.

„Ástandið á Írlandi var furðulegt fyrir aðeins tíu til tuttugu árum, það var dökkt yfir landinu þar sem mörgum steinum var að lokum velt og alls kyns andstyggðar skordýr komu í ljós undir þeim. Það var ekki fyrr en 1993 sem við afglæpuðum samkynhneigðina. Tíu árum þar á undan var það enn álitið í lagi að menn nauðguðu eiginkonum sínum,“ segir Pat Carey fyrrverandi ráðherra.

Mjög góð stemming er í miðborg Dyflinnar þar sem mikill fjöldi fólks kom saman í dag til að fagna niðurstöðu þjóðaratkvæðagreiðslunnar.