Formaður samtakanna ´78: „Erum að draga línu í sandinn og segja stopp nú stýrimann“

„Það sem við erum að gera er að leggja fram kærur eftir að umræður um fræðslustarf okkar komst í hámæli,“ segir Hilmar Hildarson Magnúsarson, formaður Samtakanna 78, í þættinum Í bítið í morgun.

Samtökin ´78 hafa ákveðið að kæra tíu einstaklinga til lögreglu fyrir hatursummæli sem þau telja refsinæm. Ummælin sem Samtökin ‘78 kæra telja þau fela í sér háð, róg og smánun í garð hinsegin fólks vegna kynhneigðar þess og/eða kynvitundar. Samtökin lögðu fram kæruna hjá lögreglunni á höfuðborgarsvæðinu í morgun.

Sjá einnig: Vill útskýra hinsegin fræðslu fyrir hlustendum Útvarps Sögu

„Bæjarstjórn Hafnafjarðar ákvað að taka upp hinsegin fræðslu í grunnskólum bæjarins og umræðan í kjölfarið varð mjög óvægin og illskeytt. Það var í raun í framhaldinu af því sem við vandlega íhuguðum málið og í samráði við okkar lögmann ákveðum að fara þessa leið.“

Hilmar segir umræðuna ekki aðeins hafa farið fram á Útvarpi Sögu.

Sjá einnig: Helgi Hrafn vill ekki láta loka síðu Gylfa

„Ég ætla ekki að fara út í einstök ummæli eða hvaða fólk sé til skoðunar, það er bara fyrir lögregluna að meta og skoða,“ segir Hilmar og bætir við að því miður séum við Íslendingar ekki komnir lengra í umræðunni.

Sjá einnig: Samtökin '78: Kæra tíu einstaklinga fyrir hatursorðræðu í garð hinsegin fólks

„Ég geri mér fullkomlega grein fyrir því að ég verð ekki vinsælasti maðurinn á Íslandi í dag en maður stendur í þessari baráttu og hefur verið kallaður ýmsum nöfnum í gegnum tíðina. Við sem stöndum í forystunni höfum brynjað okkur ágætlega fyrir allskonar hlutum en við erum að upplifa það árið 2015 að það er fólk útum allt land sem segir okkur sögur frá börnum sem eiga hinsegin foreldra og mæta aðkasti. Einnig hinsegin fólks sjálf, fjölskyldur og vinir.“

Sjá einnig: Útvarp Saga eða Tvíhöfði: Getur þú fundið út hvaðan ummælin koma?

Hann segir að þetta snúist ekki aðeins um málið í Hafnafjarðarbæ, heldur sé í mun víðara samhengi.

„Hatursumræða á Íslandi er ekkert allt í einu að dúkka upp í síðustu viku. Þetta er viðvarandi og við erum að draga línu í sandinn og segja stopp nú stýrimann. Við þurfum aðeins að skoða þetta mál, hvar sleppir tjáningarfrelsinu og hvar ertu að meiða hreinlega fólk. Þegar fólk situr undir þessu, þá hefur það gríðarleg áhrif á líf fólks og lífsgæði.“

Sjá einnig: Vill sjá ríkissaksóknara í fangelsi fyrir að taka þátt í Gleðigöngunni

Hilmar segir að margt hinsegin fólk búi við skert lífsgæði sökum umræðunnar.

„Það er mergur málsins og þess vegna setja mörg vestræn ríki löggjöf af þessu tagi. Það er allur gangur á því hvar þetta fólk lét sínar skoðanir í ljós, bara í fjölmiðlum almennt. Ég veit ekkert hvað mun koma út úr þessu en ef þetta verður til þess að vekja umræðuna um þessi mörk þá er einhver tilgangur með þessu.“