„Yfirgangur ESB er ógeðslegur“

Vigdís Hauksdóttir, fyrrverandi formaður Heimsýnar, formaður fjárlaganefndar og þingmaður Framsóknarflokksins, var ekki kát þegar hún las fréttir í morgun. „Yfirgangur ESB er ógeðslegur - á hátíðarstund er sagt að einfalt sé fyrir ríki að ganga úr Evrópusambandinu,“ skrifar Vigdís á Facebook nú rétt í þessu.

Talsmaður stækkunardeildar Evrópusambandsins hefur ítrekað að Íslendingar hafi ekki dregið aðildarumsókn að sambandinu til baka með bréfi utanríkisráðherra í síðustu viku. Fyrrverandi framkvæmdastjóri stækkunarskrifstofunnar segir að svo virðist sem ráðherrann vilji bæði eiga kökuna og borða hana.

Vigdís er langt í frá ánægð með þetta en hún lýsti því yfir í Kastljósi fyrir skömmu að hún vilji skrúfa fyrir viðræður við ESB með öllum ráðum. Henni virðist ekki ætla að verða að ósk sinni – ESB gefur lítið fyrir  frægt uppsagnarbréf Gunnars Braga Sveinssonar utanríkisráðherra og það fellur ekki í kramið hjá Vigdísi:

„Yfirgangur ESB er ógeðslegur - á hátíðarstund er sagt að einfalt sé fyrir ríki að ganga úr Evrópusambandinu. Þessu hef ég alltaf hafnað - ESB viðurkennir ekki einu sinni að ríki hætti sem umsóknarríki - þrátt fyrir að stjórnvöld hafa marg tilkynnt þeim að viðræðunum sé slitið og umsóknin löngu sigld í strand ESB ber enga virðingu fyrir fullveldi og ákvörðunarrétti þjóðríkja.“