Fjalla um börn í lestrarvanda og í áhættu

Fimmtudaginn 12. febrúar stendur Lionshreyfingin fyrir málþingi um lestrarvanda barna og aðgerðir til þessa að sporna við honum. Þetta kemur fram í tilkynningu frá Lions.

Þar mun Illugi Gunnarsson menntamálaráðherra flytja ávarp, Guðrún Björt Yngvadóttir kynnir lestrarátak Lions, Sigríður Ólafsdóttir doktorsnemi fjallar um áhrif tvítyngi á þróun læsis, Dröfn Vilhjálmsdóttir kynnir verkefni bókasafns Seljaskóla sem miða að því að efla lestraráhuga nemenda, Ingibjörg Ingólfsdóttir kynnir námskeið byggð á Davisaðferðinni  fyrir foreldra barna sem eru í efstu deildum leikskóla og grunur leikur á að þrói með sér lestrarörðugleika og Guðni Olgeirsson kynnir hugmyndir vinnuhóps menntamálaráðuneytisins um aðgerðir til að bæta læsi grunnskólabarna.

Fundarstjóri er Jón Bjarni Þorsteinsson fyrrverandi alþjóðastjórnarmaður Lions. Málþingið verður haldið  í Norræna húsinu milli kl. 16:30 og 18:30 og er öllum opið meðan húsrúm leyfir. Aðgangur er án endurgjalds.

„Eitt af þeim lestrarhvetjandi verkefnunum sem notuð eru á bókasafni Seljaskóla eru bókaskjóður. Safnið hefur komið sér upp 30 veglegum bókaskjóðum sem hver hefur að geyma bók og lestrarhvetjandi efni sem tengist bókinni,“ segir Dröfn Vilhjálmsdóttir um verkefnið í Seljaskóla.

Hún segir að dæmi um innihald í skjóðu séu matreiðslubók, bökunarform, svunta og mæliglös eða fótboltabók, fótbolti, dómaraflauta, gula og rauða spjaldið.

„Skjóðurnar njóta gífurlegra vinsælda og hafa haft ýmiss konar lestrarhvetjandi áhrif á nemendur skólans.“

Í tilkynningunni segir að Ísland sé sjálfstætt fjölumdæmi innan Alþjóðasambands Lionsklúbba. Lionsfélagar á öllu landinu séu um 2.300 talsins.

Í Lions vinna saman konur og karlar, ungir og aldnir. Lionsfélagar láta gott af sér leiða á sviði mannúðar- og menningarmála.  Klúbbar styðja hver sitt byggðarlag og taka þátt í landsverkefnum og alþjóðlegum verkefnum.

Lionsfélagar leggja lið þeim sem minna mega sín, m.a. sjúkum, sjóndöprum og fötluðum. Einnig eru verkefni tengd börnum, öldruðum, menningarmálum og umhverfi. Íslenskir Lionsklúbbar taka þátt í alþjóðastarfi Lions.

Alþjóðahreyfing Lions er fjölmennasta þjónustuhreyfing heims með fleiri en 1,3 milljónir félaga í um 45.000 klúbbum í yfir 200 löndum víðs vegar um veröldina.

Hreyfingin var stofnuð árið 1917 og allar götur síðan hafa Lionsfélagar unnið sérstaklega að því að bæta hag blindra og sjónskertra en einnig og ekki síður á margvíslegum sviðum samfélagsþjónustu.