Anderson Silva snýr aftur

Tvær goðsagnir snúa aftur í búrið eftir langa fjarveru í aðalbardaga UFC 183. Framundan er bardagi milli Anderson Silva og Nick Diaz.

Anderson Silva er goðsögn í MMA. Hann var ríkjandi millivigtarmeistari í sjö ár og var óumdeilanlega sá besti í heiminum. Hann varði beltið sitt í tíu skipti sem er það mesta í sögu UFC og hefur klárað 20 bardaga eftir rothögg.

Hann hafði einhverja ólýsanlega áru í búrinu og virtust andstæðingar hans oft búnir að tapa áður en þeir stigu í búrið. Anderson lék sér oft að andstæðingunum og gerði grín að þeim, nokkuð sem fór í taugarnar á mörgum, en enginn gat neitað því að þarna var einn sá besti í sögunni á ferð. Hér rifja MMA Fréttir upp fimm bestu frammistöður Anderson Silva á ferlinum.

Einhvern tímann rennur allt sitt skeið og tapaði Anderson titlinum til Chris Weidman í júlí 2013. Það voru einmitt trúðslætin sem urðu honum að falli. Anderson gerði grín að „máttleysi“ högganna hjá Weidman og þóttist ekki finna fyrir höggunum. Í miðjum apalátunum smellhitti Weidman á hökuna á Anderson sem rotaðist fyrir vikið. Áhorfendur ætluðu ekki að trúa eigin augum og biðu eftir því að Anderson myndi hætta gríninu og standa upp eftir höggið. En það var kaldur raunveruleikinn sem mætti Anderson er hann vaknaði úr rotinu. Hann hafði tapað titlinum.

Umsvifalaust vildu bardagaaðdáendur sjá annan bardaga á milli þeirra - tóku ekki mark á úrslitunum þar sem Anderson var bara að grínast. Ef hann myndi mæta alvarlegur til leiks og ekki með trúðslætin myndi Anderson rústa Weidman.

Annað kom á daginn 28. desember 2013. Kapparnir mættust aftur og tókst Weidman að slá Anderson niður í fyrstu lotu. Harða hakan sem Anderson var þekktur fyrir virtist vera farin og má segja að Anderson hafi verið mannlegur á ný í augum fólksins.

Þó fyrsta lota hafi verið erfið fyrir Anderson var sú næsta hryllingur. Eftir spark frá Anderson brotnaði sköflungur hans í tvennt og goðsögnin féll niður sárkvalin. Bardaginn var umsvifalaust stöðvaður og Weidman hélt beltinu.

Flestir töldu að þetta væru endalokin á ótrúlegum ferli Anderson. Þessi 39 ára gamli bardagamaður gæti hæglega látið gott heita og haft það gott í faðmi fjölskyldunnar. Aftur á móti er Anderson Silva enginn venjulegur maður og var allan tíman staðráðinn í að snúa aftur. Eftir stífa endurhæfingu mun hann snúa aftur í búrið í kvöld þegar hann mætir pörupiltinum Nick Diaz.

Nick Diaz er gríðarlega vinsæll bardagamaður og óvenjulegur maður. Hann er þó fær boxari og er óhætt að segja að bardaginn á morgun muni að mestu fara fram standandi. Fátt virðist því standa í vegi fyrir frábærum bardaga annað kvöld. Nánar má lesa um Nick Diaz á vef MMA Frétta hér.

Bardaginn er aðalbardaginn á UFC 183 og hefst aðalhluti bardagakvöldsins kl 3 og er í beinni útsendingu á Stöð 2 Sport. Eftirtaldir fimm bardagar eru á dagskrá:

Anderson Silva gegn Nick Diaz

Tyron Woodley gegn Kelvin Gastelum

Joe Lauzon gegn Al Iaquinta

Thales Leites gegn Tim Boetsch

Jordan Mein gegn Thiago Alves