Þingmaður Framsóknar hefur efasemdir um afnám tolla

Þingmaður Framsóknarflokksins segir skattkerfisbreytingar ríkisstjórnarinnar ekki hafa skilað sér til neytenda. Því sé ástæða til að hafa efasemdir um afnám tolla, líkt og fjármálaráðherra hefur boðað.

Bjarni Benediktsson, fjármálaráðherra, hefur boðað að tollar af fatnaði og skóm verði afnumdir um næstu áramót. Í byrjun árs 2017 verði síðan allir aðrir tollar afnumdir, utan þeirra sem lagðir eru á matvöru.

„Svona fljótt á litið þá skal ég alveg viðurkenna það, að ég er ögn tregur í þessu máli,“ segir Þorsteinn Sæmundsson, þingmaður Framsóknarflokksins. Hann vísar til þess að ríkisstjórnin hefur á kjörtímabilinu bæði lækkað virðisaukaskatt á tiltekna vöruflokka og afnumið vörugjöld.

„Mér finnst þær skattkerfisbreytingar sem gerðar hafa verið til þessa núna, þær hafa ekki verið að skila sér alla leið. Og það er útaf fyrir sig staðfest í könnunum, bæði frá ASÍ og Neytendasamtökin hafa bent á þetta líka,“ segir Þorsteinn.

Því hafi hann efasemdir um að afnám tolla myndi skila sér til neytenda.

„Ef að upplýsingar þær sem að ég er búinn að vera að gaumgæfa, frá ASÍ og fleirum, eru réttar, þá sitja þessar lækkanir að einhverju leyti eftir hjá versluninni. Það er ekki hægt að túlka þetta öðruvísi,“ segir Þorsteinn.

Þá bendir hann á grein eftir Guðbjörn Guðbjörnsson, yfirtollvörð hjá embætti Tollstjóra, á Eyjunni í gær. Þar kemur fram að gangi hugmyndir fjármálaráðherra eftir, myndi ekkert land hafa áhuga á því að eiga í fríverslunarviðskiptum við Ísland. Sumar þjóðir myndu jafnvel segja upp tvíhliða fríverslunarsamningum sem gerðir hafa verið.

„Það hefur ekkert land sem að ég veit um, nema hugsanlega Singapúr, afnumið tolla hjá sér svona almennt og einhliða. Og það getur komið okkur mjög illa í tvíhliða viðræðum og í viðræðum um okkar útflutning og svo framvegis,“ segir Þorsteinn.