Sköpuðu mikla hættu með því að strengja nælongirni yfir brú

Hjólreiðamaður var hætt kominn á brú yfir nýja Álftanesveginn í gærkvöldi. Nælongirni hafði verið strengt yfir brúna á veginum, sem er tilbúinn en á enn eftir að opna formlega.

Áskell Löve segist hafa verið á um 40 km hraða þegar hann kom að brúnni. Hann hafi séð nælongirnið, en þó of seint til að ná að bregðast við og bremsa. Það hafi orðið honum til happs að bandið var það lágt strengt að það lenti undir stýrinu. Í framhaldinu hafi teygst á því og það að lokum slitnað með hvelli

Sökin lá hjá tveimur tólf ára drengjum sem hlupu af vettvangi, en Áskell hljóp þá uppi og hringdi í lögregluna.

Samkvæmt upplýsingum frá lögreglunni telst málinu lokið en drengjunum var að loknu tiltali ekið heim til foreldra sinna.

Lögreglumaður hjá lögreglunni í Hafnarfirði segir að svona mál komi upp endrum og eins. Undantekningalaust sé um strákapör að ræða. 

 

Áskell segir að drengirnir hafi örugglega ekki gert sér grein fyrir því hve hættulegt uppátæki þeirra væri. Þeir hafi verið fullir iðrunar og eigi klárlega ekki eftir að gera þetta aftur.

Tæpt ár er síðan sauma þurfti tíu spor í enni hjólreiðamanns sem hjólaði á vír sem strengdur var yfir hjólabrú í Elliðaárdalnum.

Sá flaug nokkra metra fram fyrir sig og hlaut ýmis meiðsli. Gerandinn fannst aldrei.