Aðstoðarverslunarstjóri Korpuoutlets dæmdur fyrir umboðssvik

Héraðsdómur Reykjavíkur hefur sakfellt konu sem starfaði sem aðstoðarverslunarstjóri í versluninni Korpuoutlet, Korputorgi, fyrir umboðssvik.

Konan var dæmd fyrir að hafa í alls sjö skipti á tímabilinu 5.-20. júlí 2014 misnotað aðstöðu sína í versluninni í þágu vina og ættingja sem hún afgreiddi með því að skanna vörurnar inn í afgreiðslukassa verslunarinnar og bakfæra verulegan hluta þeirra út úr afgreiðslukassanum, að fjárhæð alls 139.570 króna.

„Vörurnar afhenti ákærða eftir að óverulegur fjöldi varanna stóð eftir í afgreiðslukerfinu til greiðslu með tilheyrandi tjóni fyrir Haga verslanir ehf, kt. [...] eiganda Korpuoutlet“ segir í ákæru lögreglustjórans á höfuðborgarsvæðinu.

Konan játaði brot sitt og var dæmd til 30 daga fangelsis, en framkvæmd refsingarinnar verður frestað og fellur  niður að liðnum 3 árum frá dómsuppsögu, haldi hún almennt skilorð.

Þá var konunni gert að greiða Högum hf. 139.570 krónur ásamt vöxtum.

Dóm Héraðsdóms í heild sinni má lesa hér.