Úkraínuher dregur þungavopn sín til baka

Stjórnarher Úkraínu hóf í dag að draga þungavopn sín til baka frá víglínunni í austurhluta Úkraínu. Talsmaður hersins staðfestir þetta í samtali við Interfax.

Stórskotalið hersins verður dregið til baka, en þetta er í samræmi við ákvæði vopnahléssamnings sem skrifað var undir í hvítrússnesku höfuðborginni Minsk fyrir tæpum tveimur vikum síðan.

Síðustu tveir sólarhringar hafa verið óvenjulega rólegir á víglínunni, en enginn hermaður hefur látið lífið í átökum stjórnarhersins og aðskilnaðarsinna á tímabilinu. Slíkt hefur ekki gerst í marga mánuði.