Fuglaveisla á Hawaii

Það er mikil spenna á Hyundai Tournament of Champions sem fram fer á Kapalua vellinum á Hawaii en í mótinu hafa aðeins þeir kylfingar þátttökurétt sem sigruðu á móti á PGA-mótaröðinni á síðasta ári.

Eftir tvo hringi deila fjögur þekkt nöfn efsta sætinu á 11 höggum undir pari en það eru þeir Russell Henley,Jimmy Walker, Sang-Moon Bae og sigurvegari síðasta árs, Zach Johnson.

Fimm kylfingar deila fimmta sætinu, einu höggi á eftir forystusauðunum en hinn glæsilegi Kapalua völlur, sem er par 73, er með breiðar brautir og stórar flatir og því er skor keppenda almennt mjög gott.

Tilþrif dagsins í gær átti Bandaríkjamaðurinn Charlie Hoffman en hann var aðeins millimetrum frá því að fara holu í höggi á 11. holu og vinna sér inn glænýjan bíl. Hann þurfti að sætta sig við auðveldan fugl en höggið má sjá hér.

Þriðji hringur frá Hawaii verður í beinni útsendingu á Golfstöðinni frá klukkan 19:30 í kvöld.