Svartsýnn á að takist að það semja í tæka tíð

Viðræður samninganefnda skurðlækna og ríkisins sigldu í strand á miðnætti eftir rúmlega níu stunda langan samningafund. Formaður Skurðlæknafélags Íslands er svartsýnn á að samningar náist áður en boðaðar verkfallsaðgerðir hefjast en ríkissáttasemjari sér ekki ástæðu til að boða nýjan fund í deilunni.

Samninganefndir Skurðlæknafélags Íslands og ríksins hittust klukkan þrjú í gær í Karphúsinu. Að loknum níu stunda löngum fundi var ljóst að sátt í deilunni væri ekki í sjónmáli og því ekki ástæða til að funda lengur.

„Við höfum verið að fara yfir málefnin og kasta á milli skjali sem við vonuðum við viðbrögðum frá ríkinu sem ekki hafa orðið og eftir að hafa verið að fara yfir sama málið endurtekið án breytinga þá var ekki ástæða til áframhaldandi viðræðna nú að mati ríkissáttasemjara,“ segir Helgi Kjartan Sigurðsson, formaður Skurðlæknafélags Íslands.

Enginn nýr fundur hefur verið boðaður í deilu skurðlækna og ríksins. Hins vegar ætla samninganefndir Læknafélags Íslands og ríksins að funda í Karphúsinu klukkan hálf tvö í dag.

Læknar í Læknafélagi Íslands hafa skemmri tíma til að ná samningum við ríkið þar sem verkfallsaðgerðir þeirra eiga að hefjast á miðnætti annað kvöld. Fyrsta verkfallslota skurðlækna hefst hins vegar ekki fyrr en 12. janúar eða eftir rúma viku. Helgi Kjartan er þó ekki bjartsýnn á að samningar náist á þessari viku. „ Það er orðið mjög svartsýnt um að það gerist hjá okkur skurðlæknum í það minnsta, “ segir Helgi Kjartan.

Helgi Kjartan vill ekkert gefa upp um á hverju viðræðurnar stranda né hversu mikið ber í milli deiluaðila. „Það að fara út í einhver smáatriði um kjaraviðræðurnar gerum við ekki. Það þarf bara viljann til að leysa þetta og þá er þetta leyst. Það er það sem að strandar á,“ sagði Helgi Kjartan Sigurðsson.