Ræðst af veðri og vindum hvenær dæling hefst

Stefnt er að því að byrja að dæla úr sanddæluskipinu Perlu síðdegis í dag. Bakslag kom í aðgerðirnar í gær þegar rúður gáfu sig í brú skipsins og sjór flæddi inn. Dælurnar höfðu ekki undan og var því ákveðið að reyna öðru sinni í dag. Undirbúningsaðgerðir höfðu staðið yfir í tvo daga.

Kafarar og aðrir björgunaraðilar voru að störfum til klukkan ellefu í gærkvöld. Þeir mættu aftur árla morguns til að hefja undirbúningsaðgerðir. Þétta þarf göt og holur og kanna þarf ástand skipsins, að sögn Gísla Gíslasonar, hafnarstjóra hjá Faxaflóahöfnum.

„Núna er verið að undirbúa daginn. Þeir verða fram eftir degi að bæta við loftstokkum og ganga betur frá, svo ræðst þetta þegar líður á daginn. Það veltur meðal annars á veðri og vindum,“ segir Gísli.

Hvasst er á höfuðborgarsvæðinu og töluverð rigning en það hefur gert björgunaraðilum erfiðara fyrir í morgun. Gísli vonar að það taki að lægja þegar líða fer á daginn. „Við stefnum að því að hefja aðgerðirnar um klukkan fimm, líkt og í gær,“ segir hann. Þá segir hann að unnið verði eftir sömu björgunaráætlun og útgerðarfyrirtækið Björgun lagði fram á dögunum. Með henni er meðal annars ætlunin að mynda nægilegt loftrými inni í skipinu til að það fljóti sjálft upp.

Einhver olíubrák hefur myndast en að öðru leyti hefur engin olía lekið í sjóinn. Um tólf þúsund lítrar af skipaolíu eru um borð en mengunarvarnargirðingu hefur verið komið fyrir umhverfis skipið.  Að aðgerðinni koma um fjörutíu manns. Þeirra á meðal eru starfsmenn slökkviliðs höfuðborgarsvæðisins, sem vakta flotgirðingu, en þeir hafa björgunarskip og neyðarbúnað til taks, ef vart verður við olíuleka.