Yfir 155 hafa sagt upp hjá LSH

Nokkuð var um að hjúkrunarfræðingar og aðrir starfsmenn Landspítalans sem voru í verkfalli fram að lagasetningu ríkisins um síðustu helgi segðu starfi sínu lausu í gær. Í gær var því fagnað að 100 ár eru síðan konur fengu hér kosningarétt og vildu einhverjir vekja athygli á launamun kynjanna og nýta daginn til að segja upp.

Uppsögnum hafði um hálftvö í gær fjölgað um þriðjung á tveimur dögum – farið úr 118 í 155 á spítalanum, að sögn Sigríðar Gunnarsdóttur, framkvæmdastjóra hjúkrunar. Af þeim sem sagt hafa upp eru 125 hjúkrunarfræðingar.

Þá segir Sigríður líklegt að talan sé heldur hærri, því ekki hafi náðst utan um allar uppsagnir dagsins vegna frís sem gefið var í tilefni af kvenréttindadeginum í gær. Endanleg tala verði ljós eftir helgi. „En við erum mjög áhyggjufull yfir þessu,“ segir Sigríður. „Við vonum bara að menn nýti tímann vel til 1. júlí og nái sátt. Það er engin lausn í því að hafa þetta svona.“

Ólafur G. Skúlason, formaður Félags íslenskra hjúkrunarfræðinga, segir félagið ekki hafa yfirsýn yfir uppsagnir, þær ákveði hver og einn fyrir sig. Stjórn félagsins ákvað hins vegar í gær að höfða mál á hendur ríkinu vegna laganna sem sett voru á verkfall félagsins. Einhverja daga taki að undirbúa stefnuna. Til að lausn finnist til frambúðar segir Ólafur ríkið verða að gera hjúkrunarfræðingum tilboð sem þeir telji ásættanlegt. „Við höfum þegar slegið af okkar kröfum.“