Actavis og Medis vinna til alþjóðlegra verðlauna

Actavis og Medis unnu í gær verðlaun sem veitt eru árlega fyrir framúrskarandi árangur fyrirtækja sem starfa í samheita- og líftæknilyfjaiðnaði á alþjóðavettvangi eða Global Generics & Biosimilar Awards. Þetta kemur fram í tilkynningu. Actavis hlaut verðlaun í flokki einkaleyfamálaferla ársins (e. Patent Litigation of the Year), mál sem Actavis vann fyrir dómi í Bretlandi í tengslum við markaðssetningu samheitalyfsins Pregabalin í Bretlandi. Medis hlaut verðlaun í flokki viðskiptaþróunar ársins (e. Business Development of the Year) fyrir markaðssetningu sama lyfs í Þýskalandi og Bretlandi fyrir hönd viðskiptavina sinna. Medis er dótturfélag Allergan, sem jafnframt er móðurfélag Actavis, og selur lyf og lyfjahugvit samstæðunnar til annarra lyfjafyrirtækja.

Medis var einnig tilnefnt í þremur öðrum flokkum: sem fyrirtæki ársins, fyrirtæki ársins í Evrópu, Mið-Austurlöndum og Afríku, og þá var Valur Ragnarsson, forstjóri Medis, tilnefndur leiðtogi ársins. Verðlaunin eru veitt árlega af lyfjatímaritinu Generics Bulletin í tengslum við stærstu sýningu lyfjamarkaðarins í Evrópu, CPhI, sem nú stendur yfir í Madrid. Yfir 36.000 aðilar úr lyfjageiranum frá yfir 140 löndum sækja sýninguna á ári hverju.

Þróun, skráning og vinna við markaðssetningu lyfsins fór að mestu fram á Íslandi

Pregabalin var þróað af þróunareiningu Actavis hér á Íslandi og skráningarvinnan, þ.e. umsóknir markaðsleyfa og samskipti við yfirvöld þar sem lyfið var markaðssett, voru í höndum skráningarsviðs Actavis hér á landi. Þá fór greining einkaleyfastöðu lyfsins einnig fram hér á landi. Medis vann náið með Actavis til að setja lyfið á markað fyrir sína viðskiptavini um leið og einkaleyfið á frumlyfinu rann út, fyrst í Þýskalandi og svo í Bretlandi. Actavis setti lyfið einnig á markað í Bretlandi undir sínum merkjum.

Einn besti árangur í markaðssetningu lyfs í 30-ára sögu Medis – áfangasigur hjá Actavis í einkaleyfamálaferli

Markaðssetning Medis á Pregabalin gekk vonum framar en tímalínur verkefnisins voru mjög knappar. Með samstilltu átaki starfsmanna Medis og Actavis, reynslu, þekkingu og vönduðum vinnubrögðum, gekk allt upp á mettíma, þrátt fyrir að teymið væri dreift um alla Evrópu. Lyfið var komið á markað innan fjögurra mánaða frá umsókn sem telst frábær árangur enda um gríðarlega flókið ferli að ræða.

Actavis vann áfangasigur í málaferlunum sem um ræðir. Í stuttu máli snérust þau um að framleiðandi frumlyfsins taldi að um brot á einkaleyfi væri að ræða í markaðssetningu lyfsins þar sem fyrirtækið væri með einkaleyfi á ákveðnum upplýsingum í fylgiseðli með lyfinu, þótt að einkaleyfið á lyfinu sjálfu væri runnið út. Actavis vann málið sem það telur mikilvægt fordæmi í slíkum málum og lið í því að tryggja neytendum gott aðgengi að samheitalyfjum á hagstæðu verði.