„Þingmönnum ber að fylgja eigin sannfæringu en ekki tilmælum frá kjósendum sínum“

Sigmundur Davíð Gunnlaugsson forsætisráðherra var gestur Sigurjóns M. Egilssonar í þættinum Sprengisandi á Bylgjunni í morgun. Hann ítrekaði fyrri yfirlýsingar um að ESB vildu fá skýr svör varðandi það hvort halda bæri aðildaviðræðum áfram. Þá sagði Sigmundur að afstaða ríkisstjórnarinnar hefði ekki breyst.

„Hér er um að ræða ákvörðun sem var tekin af fyrri stjórnvöldum án þess að spyrja þjóðina,“ sagði Sigmundur. „Ef ríkisstjórn hverfur frá afstöðu síðustu ríkisstjórnar er hún ekki að ganga á rétt þjóðarinnar ef það er ákvörðun sem var tekin án aðkomu þjóðarinnar.“

Sigurjón spilaði upptöku af Sigmundi frá því fyrir kosningar. Sjáum hvort þú náir að hanka mig,“ Sagði Sigmundur í gamansömum tón áður en upptakan var spiluð.

„Ég er þeirrar skoðunar að við eigum ekki að vera í aðildarviðræðum en mér finnst alveg eðlilegt að leyfa fólki að kjósa um það,“ sagði Sigmundur í upptökunni. „Þá er ekkert því til fyrirstöðu að kjósa því menn vita hvað felst í því að ganga í Evrópusambandið.“

„Ég var þráspurður og svaraði alltaf á sama hátt,“ sagði Sigmundur um upptökuna og sagðist hafa sagt í lokin að hann gerði ráð fyrir því að það hlyti að koma að þjóðaratkvæðagreiðslu einhvern tímann.

„Ég er enn þeirrar skoðunar að það verði þjóðaratkvæðagreiðsla um Evrópusambandið og við meira að segja stefnum á að breyta stjórnarskránni þannig að hægt sé að halda bindandi þjóðarakvæðagreisðlu. En eins og sakir standa eru þjóðaratkvæðagreiðslur ekki bindandi heldur ráðgefandi. Eftir stendur að þingmönnum ber samkvæmt stjórnarskrá að fylgja eigin sannfæringu en ekki tilmælum frá kjósendum sínum“

Viðtalið við Sigmund má hlusta á í spilaranum hér fyrir ofan.