Hermdu eftir Kid Snippets en ekki Haribo

Sigmar Vilhjálmsson, annar af eigendum Hamborgarafabrikkunnar, segir að nýjar auglýsingar veitingastaðarins þar sem börn tala fyrir fullorðna hafi fengið góð viðbrögð. Auglýsingarnar þykja minna nokkuð á auglýsingu frá Haribo en Sigmar segir hugmyndina ekki fengna þaðan.

„Hugmyndin okkar kviknaði út frá mjög skemmtilegum og fyndnum þáttum á Youtube sem heita Kid Snippets. Eftir að auglýsingarnar fóru svo í spilun var okkur bent á ýmsar aðrar auglýsingar þar sem börn tala líka fyrir fullorðna, meðal annars auglýsinguna frá Haribo og svo Subway gerði þetta líka fyrir Superbowl fyrir tveimur árum minnir mig,“ segir Sigmar í samtali við Vísi.

Hann segist ekki hafa búist við því að vera að finna upp hjólið með nýju auglýsingunum. Það hafi því ekki komið honum á óvart að aðrar auglýsingar þar sem börn tali fyrir fullorðna hafi verið gerðar úti í hinum stóra heimi.

Eina af auglýsingum Fabrikkunnar má sjá hér að neðan sem og Haribo-auglýsinguna og einn þátt af Kid Snippets.