Von var á 300 erlendum gestum frá 50 löndum

Í dag lýkur þriggja daga tækniráðstefnu LS Retail, ConneXion 2014, í Hörpu í Reykjavík.

Von var á því að á fimmta hundrað manns sæktu viðburðinn heim og hlýddu á erindi fjölda innlendra og erlendra sérfræðinga. Erlendir gestir eru sagðir um 300 frá 50 löndum.

Meðal þess sem fjallað hefur verið um er hvernig á næstu árum sé að vænta meiri og örari breytinga í smásöluverslun en áður hafi sést, líkt og fram kom í máli aðalfyrirlesara ráðstefnunnar, ráðgjafans, rithöfundarins og fjölmiðlamannsins kanadíska Doug Stephens.

Hann er sérfræðingur í þróun smásöluverslunar og breytingum í kauphegðun neytenda samfara örri tækniþróun.

Stephens spáir því að breytingar næsta áratugar jaðri við byltingu í smásöluverslun.

„Horfum við upp á dauða smásöluverslunarinnar eða stórkostlega endurfæðingu og upphaf gullaldar í verslun?“ er spurning sem eftir honum er höfð.

„Um þetta hefur umræðan snúist og heldur áfram að gera. Eitt er þó víst, verslun framtíðarinnar verðu mjög ólík því sem nú þekkist.“

Á ráðstefnunni átti einkum að fjalla um þarfir í smásölu- og veitingarekstri, svo sem hvernig fyrirtæki geti betur ræktað persónulegt samband við viðskiptavini.

Til að standa sig á þeim vettvangi þurfi að innleiða nýjustu tækni. Þá var fjallað um nýjustu rannsóknir á sviði kauphegðunar fólks sem nýtir sér tækni tölva og snjallsíma í æ ríkari mæli við leit og kaup á vöru og þjónustu.