Leitar að rauðhærðum, spænskum tvífara

„Það er verið að leita rauðhærðum Spánverjum með alskegg, sem líkjast mér, það er allavega búið að finna fimm Spánverja sem henta í myndbandið,“ segir tónlistarmaðurinn Davíð Berndsen, en hann mun taka upp nýtt tónlistarmyndband í Barcelona síðar í mánuðinum.

Myndbandið er við lagið Two Lovers Team og er því leikstýrt af hinum spænska Pablo Larcuen. „Hann er þekktur á Spáni en við kynntumst á kvikmyndahátíð í Los Angeles, þá vann hann til verðlauna á hátíðinni fyrir stuttmynd sem hann var að gera,“ segir Berndsen. Honum var boðið á áðurnefnda kvikmyndahátíð eftir að tónlistarmyndbandið við lagið Supertime kom út.

Nýja myndbandið er ádeilumyndband á tónlistarheiminn. „Myndbandið fjallar um að það verði hægt að halda marga tónleika á sama tíma og því gott að hafa okkur frekar líka,“ segir Berndsen og hlær.

Þá kemur hann einnig fram á tónleikum í Barcelona á sama tíma. „Við erum að fara að spila á rosalega flottum stað sem heitir Razmatazz, það eru meira að segja plötusnúðar inni á klósettunum,“ bætir Berndsen við.

Hann hefur búið í Berlín undanfarna mánuði en er á leið heim í nám. „Ég er að fara í leiðsögunám í Háskóla Íslands eftir að hafa verið í skóla lífsins síðastliðin níu ár. Þjóðverjarnir vita svo mikið um Ísland að ég var farinn að skammast mín og ákvað að kýla á leiðsögunámið til að fræðast aðeins um land og þjóð,“ segir Berndsen léttur í lundu, og bætir við; „Maður vill geta bent barninu sínu á einhver kennimerki á Íslandi þegar maður er á leið um landið.“