Leoncie setur húsið sitt á sölu

„Ég hef sett húsið mitt á sölu og það gæti alveg verið að ég flytti út aftur,“ segir tónlistarkonan Leoncie en hún flutti til Íslands fyrr á þessu ári eftir að hafa búið í Englandi um nokkurt skeið. Hún segist vera komin með heimþrá til Bretlands.

„Ég er líka orðin þreytt á gjaldeyrismálunum, ef Seðlabanki Íslands hefði ekki rænt okkur um hábjartan dag fyrir hálfvirði þá hefði ég aldrei komið Íslands. Þessi virðisaukaskattur er bölvun,“ bætir Leoncie við. Hún býr nú í Keflavík og vildi búa sem næst flugvellinum svo styttra væri til útlanda.

Fyrir skömmu birti hún færslu á Facebook þar sem hún lýsti eftir karlmanni til þess að leika á móti sér í nýju tónlistarmyndbandi. „Ég fékk sendar fullt af myndum og margir af þessum mönnum voru naktir. Þeir voru misflottir en voru allir íslenskir,“ segir Leoncie spurð út í eftirspurnina eftir að leika í myndbandinu hennar.

Hún er á leið til Bretlands þar sem hún ætlar að taka upp tónlistarmyndband. „Ég ætla að taka upp þrjú myndbönd í sumar, tvö í Englandi og eitt á Íslandi.“ Hún leikstýrir myndböndunum sjálf. „Ég hef samið lögin og textana og veit nákvæmlega hvernig ég vil hafa þetta,“ bætir hún við.