Luiz: Við vildum bara gleðja þjóðina

Leikmenn brasilíska landsliðsins fá sjálfsagt ekki að gleyma tapinu gegn Þýskalandi í kvöld á meðan þeir lifa.

Þýskaland tryggði sér sæti í úrslitum HM í Brasilíu með 7-1 sigri á heimamönnum í undanúrslitum í kvöld.

Thiago Silva var ekki með brasilíska liðinu í kvöld vegna leikbanns og var annar varnarmaður, David Luiz, fyrirliði í hans fjarveru.

„Ég vildi bara gleðja fólkið mitt. Ég vil biðja alla Brasilíumenn afsökunar,“ sagði hann einfaldlega eftir leikinn.

Markvörðurinn Julio Cesar átti erfitt með að útskýra tapið. „Það er einfaldlega erfitt að útskýra þetta. Það verður að gefa Þjóðverjum það að þeir voru sterkir.“

„Við brotnuðum saman eftir fyrsta markið en enginn átti von á því. Ég er virkilega sorgmæddur. Ég hefði frekar viljað tapa 1-0 með mistökum frá mér en að upplifa 7-1 tap.“