Byltingu spáð í smávöruverslun

Tækniráðstefnan ConneXion 2014 verður haldin í Hörpu í næstu viku, en á hana hafa vel á fimmta hundrað manns boðað komu sína. Þar af um þrjú hundruð erlendir gestir frá 50 löndum. Á þriðja tug íslenskra og erlendra fyrirlesara frá fjölda landa halda erindi á ráðstefnunni.

Aðalfyrirlesari ráðstefnunnar verður Doug Stephens, ráðgjafi, rithöfundur og fjölmiðlamaður frá Kanda. Hann er sérfræðingur í þróun smásöluverslunar og breytingum í kauphegðun neytenda samfara örri tækniþróun. Í tilkynningu segir að hann spái því að á næstu tíu árum muni smásöluverslanir upplifa meiri breytingar í rekstrarumhverfi en áður hafa sést, breytingar sem jaðrað geti við algera byltingu.

Fyrirlesarar koma frá flestum heimshornum, Miðausturlöndum, Asíu, Indlandi, Bandaríkjunum, Kanda og Evrópu. Ráðstefnan í Hörpu hefst nk. mánudag, 12. maí, og lýkur á miðvikudag.

Einkum verður fjallað um helstu þarfir smásölu- og veitingaaðila og meðal annars hvernig fyrirtækin geti ræktað betur persónulegt samband við viðskiptavini. Þá út frá þörfum og áhuga hvers og eins.

Einnig verður fjallað um nýjustu rannsóknir á sviði kauphegðunar neytenda sem nýta sér tækni tölva og snjallsíma í æ ríkari mæli við leit og kaupa á vöru og þjónustu.

Þar munu koma saman hugbúnaðarframleiðendur sem styðjast við lausnir LS Retail, endursöluaðilar hugbúnaðar frá fyrirtækinu og síðast en ekki síst fulltrúar aðila um allan heim sem nota kerfi fyrirtækisins í rekstrinum.