Martin skoraði sigurkörfu LIU Brooklyn í nótt - 34 íslensk stig

Elvar Már Friðriksson var stigahæstur hjá LIU Brooklyn í nótt þegar liðið fagnaði sínum fjórða sigri í röð nú eftir 73-72 sigur á New Hampshire í framlengdum leik. Það var hinsvegar Martin Hermannsson sem skoraði sigurkörfuna.

Íslensku bakverðirnir fóru á kostum í leiknum en Elvar Már var með 19 stig og 3 stoðsendingar en Martin Hermannson skoraði 15 stig, tók 7 fráköst og gaf 4 stoðsendingar. Saman voru íslensku leikmenn LIU Brooklyn með 34 stig, 11 fráköst og 7 stoðsendingar.  

Martin hitti úr 6 af 10 skotum sínum þar af 2 af 3 fyrir utan þriggja stiga línuna. Báðir spiluðu þeir Elvar og Martin yfir 40 mínútur í leiknum.  Elvar átti fyrri hálfleikinn (16 af 19 stigum) en Martin skoraði 12 af stigum sínum í seinni hálfleik og framlengingu.

LIU Brooklyn komst í 7-0 í leiknum en Íslendingarnir skoruðu fimm fyrstu stigin, Martin setti fyrst þrist eftir stoðsendingu frá Elvari sem skoraði síðan sjálfur með sniðskoti. LIU var einu stigi yfir í hálfleik, 38-37, en New Hampshire skoraði fimm síðustu stig hálfleiksins.

Elvar kom LIU Brooklyn í 64-63 með þriggja stiga körfu en New Hampshire tryggði sér framlengingu með því að setja niður 1 af 2 vítum sínum sextán sekúndum fyrir leikslok. Elvar fékk þriggja stiga skot í lokin en hitti ekki og því varð að framlengja leikinn.

Martin Hermannsson skoraði sigurkörfu LIU Brooklyn tíu sekúndum fyrir leikslok en það voru einu stig íslensku bakvarðanna í framlengingunni.

íslensku bakvarðanna í framlengingunni.