Arsenal lagði fram tilboð í Khedira

Spænski miðillinn AS greinir frá því í dag að Arsenal hafi lagt fram tilboð upp á 29 milljónir evra í Sami Khedira, leikmann Real Madrid.

Khedira sem á aðeins eitt ár eftir af samningi sínum hefur ekki náð samkomulagi við Real um nýjan samning. Talið er að félagið muni reyna að selja Khedira í sumar frekar en að missa hann frítt næsta sumar.

Real Madrid er við það að ganga frá kaupunum á liðsfélaga Khedira í þýska landsliðinu, Toni Kroos, á 30 milljónir evra frá Bayern Munchen. Talið er að Kroos muni taka sæti Khedira í liði Madrídarmanna.

Khedira sem er 27 ára gekk til liðs við Real Madrid árið 2010 og hefur hann leikið 144 leiki fyrir félagið í öllum keppnum og hefur hann unnið alla titla sem í boði eru hjá félaginu.