Stolt af rauða hárinu

„Maður fer bara upp á svið og þau velja þann sem er rauðhærðastur,“ segir Vaka Agnarsdóttir en hún var valin efnilegasti rauðhærði Íslendingurinn á Írskum dögum á Akranesi í fyrra.

Vaka segist vera stolt af því að vera rauðhærð en hún vann reiðhjól fyrir sigurinn en sá sem sigrar í eldri deild keppninnar vinnur ferð fyrir tvo til Dublin í boði Úrvals Útsýnar.

Keppnin fer fram í fimmtánda sinn nú um helgina á Írskum dögum en í byrjun júlí ár hvert halda Skagamenn dagana hátíðlega til þess að minnast írskrar arfleifðar sinnar sem er meðal annars rautt hár.

Titillinn rauðhærðasti Íslendingurinn þykir afar eftirsóttur en tugir keppenda hafa mætt á ári hverju til að sýna hár sitt og freista þess að sigra. Sjálf býr Vaka í Hafnarfirði en hafði lengi langað til þess að taka þátt í keppninni. „Síðan er fullt af tækjum og alls konar,“ segir Vaka en meðal annarra dagskrárliða bæjarhátíðarinnar eru götugrill, útitónleikar, brekkusöngur, Hálandaleikar og margt fleira.