Skoðun

Landbúnaður og loftslagsmál

Hörður Harðarson skrifar
Í tengslum við allsherjarþing Sameinuðu þjóðanna sem fram fór á dögunum boðaði Ban-Ki Moon, aðalritari samtakanna, leiðtoga ríkja heimsins til fundar um loftslagsmál. Tilefnið var að finna leiðir til að sporna við loftslagsbreytingum af manna völdum og leggja grunn að nýrri stefnu Sameinuðu þjóðanna í loftslagsmálum fyrir loftslagsráðstefnuna í París á næsta ári. Ban-Ki Moon lét þar þau orð falla að „aldrei hafi svo margir leiðtogar komið saman og heitið því að grípa til aðgerða vegna loftslagsbreytinga“ og átti þar bæði við leiðtoga risavelda á borð við Bandaríkin og Kína sem og litla Íslands. Það er því almenn samstaða um að aðgerða sé þörf en hvað er hægt að gera?



Rúmlega fjórðungur af öllum útblæstri gróðurhúsalofttegunda er vegna samgangna, það er að segja flutninga á fólki eða vöru frá einum stað til annars. Um það bil helmingur af því er tilkominn vegna flutninga á vöru. Þar sem Ísland er eyja í miðju Norður-Atlantshafi segir það sig því sjálft að vöruflutningar til landsins fela í sér gríðarmikinn útblástur gróðurhúsalofttegunda. Til landsins er flutt mikið af vörum sem ekki er hægt að framleiða hér á landi af ýmsum ástæðum en við höfum á móti náð miklum árangri við framleiðslu á annarri vöru. Því er rétt að skoða betur hvort Ísland geti aukið innlenda framleiðslu til að draga enn frekar úr flutningi til hagsbóta fyrir umhverfið. Í þessu felst tækifæri til aðgerða.



Íslenskur landbúnaður getur séð landsmönnum fyrir umhverfisvænni kjötvöru og grænmeti. Aðföng til landbúnaðar á Íslandi koma að litlu leyti erlendis frá. Þá hafa tilraunir hér á landi við kornrækt bæði til manneldis og ekki síður til fóðurgjafar gefið það góða raun að miklar líkur eru á að hægt verði að draga nokkuð úr innflutningi á fóðri á næsta áratug.



Það er ekki bara verkefni þjóðarleiðtoga að bregðast við þeim þeim vanda sem hlýnum jarðar er. Þó vandamálið sé hnattrænt geta allir lagt sitt af mörkum til þess að leysa það. Með því að leggja áherslu á að neyta umhverfisvænna matmæla sem framleidd eru í nágrenninu er hægt að draga úr útblæstri gróðurhúsalofttegunda vegna vöruflutninga. Þar skiptir íslenskur landbúnaður miklu máli.




Skoðun

Skoðun

Ótti

Gunnar Dan Wiium skrifar

Sjá meira


Velkomin á Vísi. Þessi vefur notar vafrakökur. Sjá nánar.