Íslenska Glamour kynnt til sögunnar

„Okkar stefna er að búa til faglegt tímarit sem er leiðandi í tísku-og lífstíltengdri umfjöllun á Íslandi ásamt viðtölum og öðru áhugaverðu efni,” segir Álfrún Pálsdóttir, ritstjóri íslensku útgáfu tímaritsins Glamour sem kemur út á næstu mánuðum.

Tímaritið er eitt af vinsælustu lífstílstímaritum fyrir konur í heiminum og verður íslenska útgáfan af Glamour sautjánda erlenda útgáfan af tímaritinu. Þetta er í fyrsta sinn sem alþjóðlegur fjölmiðill kemur út í íslenskri útgáfu en 365 miðlar gefa tímaritið út í samstarfi við útgáfurisann Condé Nast.

Álfrún segir efnistökin verða fjölbreytt en tíska mun skipa stóran sess, eins og tíðkast í öðrum útgáfum Glamour. Hún er menntuð í fjölmiðlum og kynjafræði frá háskólanum í Osló og hefur unnið á Fréttablaðinu með hléum frá 2006, nú síðast sem umsjónarmaður helgarblaðs Fréttablaðsins.

„Tímaritið verður íslenskt, á íslensku og efnistökin sérsniðin að íslenskum lesendum. Þetta er samt sem áður alþjóðlegur miðill sem verður búinn til samkvæmt stöðlum Condé Nast. Blaðið mun finna sína sérstöðu og markmiðið er að endurspegla hinn íslenska stíl ásamt því að vera samkeppnishæft við aðra alþjóðlega miðla,” segir Álfrún og bætir við að það sé ómetanlegt að fá tækifæri til að vinna tímarit með Condé Nast, einu virtasta fjölmiðlafyrirtæki í heiminum. 

Conde Nast gefur út tímarit á borð við Vogue, GQ, Wired og Vanity Fair.

„Við fáum aðgang að gagnabanka þeirra en þaðan getum við sérvalið efni inn í blaðið hverju sinni sem verður þýtt. Efnistökin verða því fjölbreytt blanda af þýddu efni og efni sem unnið verður af íslenskri ritstjórn blaðsins. ”

Teymið sem mun sjá um að þróa tímaritið á næstu mánuðum er auk Álfrúnar, Silja Magg, Regína Rourke og Ólöf Skaftadóttir.

Silja er ljósmyndari, útskrifuð frá Parsons í New York, og mun gegna hlutverki ljósmynda-og tískuritstjóra blaðsins. Hún hefur skipað sér í framlínu íslenskra ljósmyndara og þótt víðar væri leitað. Silja hefur myndað fyrir tímarit og þekkt vörumerki á borð við GQ Magazine, Marie Claire, ELLE, Nylon Magazine, New York Post, French Connection, Barneys New York, Macy's, Bloomingdale's og Moncrief, svo eitthvað sé nefnt. Þá hefur Silja haldið fjölmargar sýningar á verkum sínum, í Bandaríkjunum og Rússlandi.

Regína er menntaður grafískur hönnuður frá Parsons í New York og verður útlitshönnuður Glamour (e. art director).

Hún hefur starfað í auglýsingaherferðum fyrir Bloomingdales, DKNY, Gap og Proper Gang. Þá hefur hún unnið sem art director hjá Condé Nast fyrir Style.com og Womens Wear Daily. Regína situr í stjórn Iceland American Chamber of Commerce og haldið sýningar á verkum sínum hér heima og erlendis. 

Ólöf er menntuð í skapandi skrifum frá Háskóla Íslands og stýrir vef- og samfélagsmiðlum Glamour, en samhliða tímaritinu verður öflugri vefsíðu haldið úti undir slóðinni Glamour.is. Tímaritið verður áberandi á helstu samskiptamiðlum.

Auk þess situr Ólöf í ritstjórn tímaritsins, en hún hefur reynslu af fjölmiðlum, bæði af vef- og prentmiðlum, auk þess hefur hún mikla reynslu af þýðingum og handritsskrifum.

„Þetta er gríðarlega spennandi verkefni sem fela í sér mikil tækifæri. Við erum gott teymi sem munum sjá til þess að efnistökin verði fagleg. Á næstu mánuðum verðum við í góðri samvinnu við Condé Nast að þróa efnistök blaðsins, þar sem við munum fá tækifæri til að læra af þeim bestu. Ég hef trú á að Glamour verði sterk viðbót í fjölmiðlaflóru landsins.”

Nánari dagsetning á útgáfudegi fyrsta tölublaðsins verður tilkynnt síðar.

GLAMOUR ER...

-Eitt vinsælasta lífstílstímarit fyrir konur í heiminum í dag.

-Lesendur blaðsins á heimsvísu eru um 11.7 milljónir á mánuði.

-Meðal landa sem gefa út sínar eigin útgáfur af Glamour bæði á vef og prenti eru Frakkland, Þýskaland, Mexíkó, Bretland, Bandaríkin, Búlgaría, Pólland, Suður Afríka, Spánn, Holland, Rúmenía og Rússland.

-Condé Nast International er nú starfrækt á 27 mörkuðum, gefa út 126 tímarit, helda úti nálægt 100 vefsíðum og eru með yfir 200 smáforrit fyrir síma og spjaldtölvur.

-Auk hefðbundinnar fjölmiðlaútgáfu hefur CNI staðið að stórum viðburðum í tískuheiminum eins og Vogue"s Fashion Night Out, GQ Men of the Year-verðalaunin og Glamour Women of the Year. Nýlega opnaði CNI sinn eigin skóla í London, the Condé Nast College of Fashion & Design.