Heklaði soninn í heiminn

Rétt fyrir utan Borgarnes er Ljómalind, sveitamarkaður þar sem íslenskt handverk og matvæli beint frá býli eru seld. Meðal annarra fallegra hluta sem þar má finna eru heklaðir hringir eftir Rósu Hlín Sigfúsdóttur. „Hugmyndin að hringjunum kom eftir að ég sá mynd af konu í blaði sem var með stóran hring sem líktist blómi. Þá datt mér í hug að ég gæti heklað blóm og búið til hring. Ég prófaði og fólk fór að spyrja mig út í hringina og vildi kaupa. Þetta vatt svo allt saman upp á sig og spurðist út. Ég seldi hringina í Borgarnesi og á Facebook,“ segir Rósa Hlín.

Þar sem salan á hringjunum gekk svona vel sá hún leið til að fjármagna glasafrjóvgun en Rósa Hlín og maður hennar höfðu reynt að eignast barn í nokkurn tíma. „Eins og allir vita er glasafrjóvgun mjög dýr en á hálfu ári seldi ég yfir þúsund hringi þannig að það dugði fyrir meðferð og öllum aukakostnaði, svo sem ferðakostnaði og kostnaði við heilun, nálastungu, sálfræðiþjónustu og fleiru. Þetta virkaði allt saman og okkur tókst að eiga barn þannig að það má segja að ég hafi heklað soninn, Sigfús Inga, í heiminn,“ segir hún og brosir.

Sveitamarkaðurinn Ljómalind var stofnaður af tólf konum af Vesturlandi og þeirra á meðal er Rósa Hlín. Á markaðnum eru eingöngu seldar vörur frá Vesturlandi og þegar Ljómalind var opnuð var Rósa Hlín beðin um að hafa hringina þar til sölu. „Ég hélt að markaðurinn væri mettur af þessum hringjum en það seldist allt sem ég átti til þannig að ég hef þurft að gera meira af þeim. Ég hef alla tíð haft mjög gaman af handavinnu og skemmtilegast finnst mér að hekla. Ég er úr sveit þar sem ekki var nein Stöð 2 og það varð oft rafmagnslaust og þá var gott að geta dundað við handavinnuna. Mér finnst gaman að hekla stór og kósí teppi úr íslenskri ull en ég hekla líka margt annað og prjóna.“