Umdeildir Jersey-strákar

Nýjustu mynd Clints Eastwood verður frumsýnd á morgun en hún ber nafnið Jersey Boys. Myndin er byggð á samnefndum söngleik sem var frumsýndur árið 2005 á Broadway og hefur hlotið meðal annars fern Tony-verðlaun.

Síðan þá hefur söngleikurinn farið sigurför um heiminn og notið gríðarlegra vinsælda. Myndin hefur hins vegar verið umdeild á meðal gagnrýnenda þrátt fyrir að hafa hlotið lof almennra áhorfenda, ekki síst þeirra sem þekkja vel til tónlistarinnar.

Þeir ættu að vera margir, enda áttu bæði The Four Seasons og forsöngvari þeirra, Frankie Valli, marga stórsmelli á borð við Big Girls Don‘t Cry, Sherry, December 1963, My Eyes Adored You, Can‘t Take My Eyes Off You, Walk Like a Man og Rag Doll.

Myndin greinir frá sögu ungu mannanna sem skipuðu sveitina The Four Seasons og urðu heimsfrægir í byrjun sjöunda áratugar síðustu aldar. Um leið þurftu þeir að glíma bæði við það góða sem frægðinni fylgdi og það slæma.

Ástæðan fyrir neikvæðu gagnrýninni sem myndin hefur þurft að sæta er meðal annars að gagnrýnendur eru á því máli að það hafi verið mistök að fá Clint Eastwood til þess að leikstýra myndinni.

Myndin hefur mjög dimman blæ yfir sér, sem verður að teljast skrítið þar sem að hún er byggð á söngleik þar sem dans- og skemmtiatriði eru í fyrirrúmi. Í myndinni leggur Eastwood áherslu á persónulega sögu sveitarinnar, skilnaði, uppeldið og vafasama tengingu sveitarinnar við mafíuna.

Hér er Dirty Harry að horfast í augu við sögu hljómsveitar sem kom fram á sjónarsviðið og sló fljótlega í gegn með grípandi lögum.