Fagna því að hafa fengið að lifa svona langan dag

„Ég er ekki manneskja sem hefur haldið mikið upp á afmælin sín en nú hef ég tórt svo lengi og ákvað að fagna því að hafa fengið að lifa svona langan dag,“ segir Bjarnfríður Leósdóttir, fyrrverandi kennari og verkalýðsfrömuður, glaðlega.

Hún verður níræð á morgun, 6. ágúst, og verður með opið hús í sal Félags eldri borgara á Akranesi milli klukkan 17 og 19.

Bjarnfríður fæddist á Másstöðum við Akranes og hefur átt heima á Skaganum alla sína tíð. Nú býr hún á dvalarheimilinu Höfða.

Frá því hún lauk prófi frá Samvinnuskólanum kveðst hún hafa unnið fjölbreytt störf, allt frá síldarsöltun til setu á Alþingi.

„Ég jók við menntun mína á fullorðinsárum og gerðist kennari við Fjölbrautaskólann og tók líka leiðsögumannspróf,“ rifjar hún upp og minnist einnig starfa sinna með hinum ýmsu félögum en Bjarnfríður varð þjóðþekkt fyrir afskipti sín af verkalýðs-og jafnréttismálum.

Í áratugi hefur hún verið í bókmenntaklúbbi sem enn er við lýði.

„Við komum alltaf vel lesin á fundi og það hefur gefið okkur mikla menntun og vitneskju um bókmenntir. Svo var ég líka í leikfélaginu og eitt af því sem ég lék var Snæfríður Íslandssól í Íslandsklukkunni.“

Í einkalífinu kveðst Bjarnfríður hafa verið heppin nema hvað hún hafi misst manninn sinn snemma. Hann hét Jóhannes Finnsson og lést af slysförum við sjómennsku árið 1974.

Börnin urðu fjögur, Steinunn, Eyjólfur, sem aðeins varð sólarhringsgamall, Leó og Hallbera.

„Börnin fóru menntaveginn, tvö eru kennarar og eitt leikari og rithöfundur,“ segir Bjarnfríður.

„Ég held því hiklaust fram að fólk eins og ég, sem kem úr verkalýðsstétt, hafi lagt sig fram um að mennta sín börn svo þau gætu sinnt vandasamari verkum.“



Bjarnfríður kveðst líta með ánægju yfir farinn veg. „Lífið hefur farið vel með mig að flestu leyti og ég held ég hafi líka svolítið unnið að því.“