„Spurðu mig bara hvernig ég héldi jafnvægi“

„Ég var í verslunarmiðstöð þegar einhver kona kom upp að mér og talaði flæmsku. Ég skildi ekkert fyrr en hún skipti yfir í ensku og vildi fá mig á skrá,“ segir Rós Kristjánsdóttir en hún var að heimsækja móður sína í Brussel í seinustu viku þegar hún skrifaði nýverið undir samning hjá umboðsstofunni Dominique Models.

„Fyrst fór ég bara að skoða þessa stofu og leist vel á það sem þau voru að gera,“ segir Rós sem fór síðan á fund til þeirra þar sem hún var mæld og send í myndatöku.

„Þau vildu fá mig í hæla á myndinni og spurðu mig hvaða stærð ég væri, síðan hlógu þau öll þegar ég sagðist vera stærð 38,“ segir fyrirsætan sem er tæpir 180 sentímetrar á hæð. „Þau spurðu mig bara hvernig ég héldi jafnvægi.“

Rós stundar nám í mannfræði við Háskóla Íslands og mun halda því áfram í fjarnámi í vetur. „Ég tek örugglega nokkra mánuði úti í einu og kem síðan heim inn á milli en það er ekkert komið á hreint.“

Móðir Rósar, Sigrún Jónsdóttir, starfar hjá fastanefnd Íslands í Brussel og hefur Rós íhugað að feta í fótspor hennar.

„Ég hef alltaf haft áhuga á stjórnmálafræði og gæti hugsað mér að fara í það nám eftir mannfræðina,“ segir fyrirsætan sem ætlar þó fyrst að sjá hvernig gengur hjá nýju stofunni og í fjarnáminu. „Þetta getur farið á svo marga mismunandi vegu. Það er allt opið.“