Kynnast landi forfeðra og -mæðra

Hópur ungmenna frá Kanada og Bandaríkjunum er á Íslandi núna á vegum Snorraverkefnisins. Hann kom til landsins 15. júní og tók tvær fyrstu vikurnar þátt í náms- og menningardagskrá í samstarfi við Stofnun Árna Magnússonar í íslenskum fræðum.

Þá tóku ættingjar ungmennanna við keflinu og hópurinn dreifðist um landið til þriggja vikna dvalar. Í flestum tilfellum er um að ræða staði sem formæðurnar eða -feðurnir fóru frá á sínum tíma. Meðal staða má nefna Akureyri, Sauðárkrók, Borgarfjörð eystri, Reyðarfjörð, Bolungarvík, Seyðisfjörð, Húnavatnssýslur og Borgarnes.

Eftir dvölina hjá skyldfólkinu heldur hópurinn svo saman í vikulanga landkynningarferð sem að þessu sinni verður um Vesturland og Vestfirði með viðkomu á Vesturfarasetrinu á Hofsósi.

Hópurinn hefur náð vel saman og meðal annars farið í dagsferð um Suðurland, í keilu, sund og flúðasiglingar og smakkað sviðasultu, kjötsúpu og slátur. Allt hefur þetta hjálpað ungmennunum að kynnast landinu sem forfeður þeirra og -mæður yfirgáfu. Þau halda svo aftur til síns heima 25. júlí.

 

Snorraverkefnið miðar að því að styrkja tengslin milli afkomenda Vestur-Íslendinga og annarra Íslendinga bæði hér á Íslandi og í Norður-Ameríku. Á hverju sumri er hér á landi tekið á móti 14 til 16 ungmennum af íslenskum uppruna. Verkefnið var sett á fót árið 1999 og er samstarfsverkefni Norræna félagsins og Þjóðræknisfélags Íslendinga.