Gæðakokkar skipta um nafn

Fyrirtækið Gæðakokkar ehf. í Borgarnesi hefur skipt um nafn. Fyrirtækið heitir nú Kræsingar ehf. Skessuhorn greinir frá þessu.

Ekki hefur verið skipt um kennitölu á fyrirtækinu.

Samkvæmt heimasíðu fyrirtækisins sérhæfir það sig í aukaefnalausum tilbúnum matvörum fyrir mötuneyti og stóreldhús en hefur einnig verið með veisluþjónustu. Þá framleiðir fyrirtækið einnig þorramat ásamt góðu úrvali af grænmetisréttum og ýmsum kjötvörum.

Mál Gæðakokka vöktu mikla athygli á fyrri hluta síðasta árs þegar í ljós kom að fyrirtækið hafði markaðssett tvær vörutegundir sem sagðar voru innihalda nautakjöt en svo var ekki samkvæmt rannsókn Matvælastofnunar.

Þannig var Nautabaka frá Gæðakokkum sögð innihalda 30% nautahakk í fyllingu sem átti að vera helmingur af þyngd vörunnar en innihélt ekkert kjöt.