Fimmti hver fékk greitt frá TR

Rúmlega fimmti hver Íslendingur fékk greiðslur í einhverri mynd frá Tryggingastofnun ríkisins á síðasta ári. Þetta eru lífeyrisgreiðslur, félagslegar bætur, greiðslur til foreldra langveikra og alvarlega fatlaðra barna eða fjárhagsaðstoð til lifandi líffæragjafa svo dæmi séu nefnd.

Þeim sem fengu greiðslur frá stofnuninni fjölgaði um 3.500 frá árinu á undan.

Þetta er meðal þess sem kemur fram í ársskýrslu Tryggingastofnunar fyrir síðasta ár.

Örorkulífeyrisþegum fjölgaði um rúm fjögur prósent en endurhæfingarlífeyrisþegum fjölgaði þó hlutfallslega mest eða um 14,5 prósent.

Hjá Tryggingastofnun voru rúmlega 17 þúsund einstaklingar með 75 prósenta örorkumat árið 2013.

Geðraskanir voru algengasta fyrsta orsök örorku eða hjá tæplega 38 prósentum. Þetta er heldur hærra hlutfall en tíu árum áður en þá var hlutfallið 35 prósent. Stoðkerfissjúkdómar fylgdu fast á eftir og voru önnur algengasta orsök örorku.

Mun fleiri konur voru með örorkumat en karlar. Konur sem voru metnar 75 prósenta öryrkjar á síðasta ári voru 10.200 en tæplega sjö þúsund karlar voru í sömu stöðu.

Munur var einnig á dreifingu sjúkdómaflokka eftir kynjunum. Hjá körlum voru geðraskanir stærsti flokkurinn, en stoðkerfissjúkdómar hjá konum.