Hagskýrsla OECD í samræmi við hagspár

„Þetta virðist vera í línu við spá okkar frá síðustu viku,“ segir Ingólfur Bender, forstöðumaður Greiningar Íslandsbanka. „Megintónninn er svipaður. Það er að segja að nú eru ágætar hagvaxtarhorfur, þetta og næsta ár. Okkar spá hljóðar upp á nær sama hagvöxt og þeir eru að spá á næsta ári. Við reiknum hins vegar með því að hagvöxturinn í ár verði aðeins meiri en OECD reiknar með.“

OECD spáir allgóðum hagvexti hér á landi samkvæmt nýrri efnahagsskýrslu sem birt var í gær. Spáð er fyrir um 2,7 prósenta hagvöxt á þessu ári og að hann verði 3,2 prósent á næsta ári. Í skýrslunni segir að hagvöxtur í fyrra hafi verið töluvert meiri en gert hafði verið ráð fyrir. Stærstu áhrifavaldar þess eru sagðir vera vöxtur í útflutningi og ferðamennsku. „Hagkerfið er að komast í sæmilegt jafnvægi, en það er sjaldgæft í íslenskri efnahagssögu.“

Einnig segir í skýrslu OECD að atvinnulausum hafi fækkað á Íslandi og aðgerðir stjórnvalda til skuldalækkunar heimila muni auka einkaneyslu og hraða efnahagsbata á þessu ári. Þær aðgerðir verða að mestu fjármagnaðar með hærri skatti á skuldir banka og segir í skýrslunni að nauðsynlegt verði að hækka stýrivexti.

„Það er í samræmi við það sem við höfum verið að segja. Þegar kemur fram á næsta ár og þarnæsta, þegar spenna fer að byggjast upp í hagkerfinu að nýju og slakinn fer. Samkvæmt þjóðhagsspá okkar eru þrjár stýrivaxtahækkanir á næsta ári og ein árið 2016. Reiknum við með að hver hækkun verði 0,25 prósent. Það er líka í takt við orð peningastefnunefndar,“ segir Ingólfur.

Spáin gerir ráð fyrir minnkandi útflutningi á þessu ári og því næsta sem og meiri innflutningi. Þá er gert ráð fyrir að verðbólga muni hækka, sérstaklega á næsta ári, vegna aukins launakostnaðar.

Í skýrslunni segir að þó séu margir óvissuþættir á íslenskum efnahag. Erfitt sé að spá fyrir um erlenda fjárfestingu í framleiðslu- og orkugeirunum vegna lægri eftirspurnar í heiminum eftir áli. Þá skapi gjaldeyrishöftin einnig óvissu, sem og dómsmál vegna krafna í þrotabú föllnu bankanna, svo dæmi séu tekin.

„Kerfislæg vandamál hrópa á mann í kringum fjármagnshöftin og erlendu aðilana í þrotabúunum. Hvernig leyst verður úr því er stóri skugginn í þessari annars frekar björtu mynd sem birtist í hagspám fyrir Ísland um þessar mundir og mesta áhættan varðandi það að spáin rætist eða ekki,“ segir Ingólfur.

„Í heildina, hvort sem við lítum á spá okkar, OECD eða annarra aðila undanfarið, þá eru þær flestar svipaðar. Spá ágætum hagvexti, að slakinn í hagkerfinu sé að hverfa og hagur íslenskra heimila vænkast.“