Vodafone Group sýnir verkefni á Glerártorgi áhuga

„Vodafone Group er að sýna þessu verkefni heilmikinn áhuga enda er þetta fyrirkomulag ekki þekkt í verslunum fyrirtækisins erlendis,“ segir Björn Víglundsson, framkvæmdastjóri sölu- og þjónustusviðs Vodafone á Íslandi.

Fyrirtækið hefur ákveðið að opna nýja tvö hundruð fermetra verslun í verslunarmiðstöðinni Glerártorgi á Akureyri í samstarfi við Te og kaffi. Ákvörðunin hefur vakið áhuga breska fjarskiptarisans Vodafone Group sem er þessa dagana að breyta öllum 2.500 verslunum sínum.

„Verslunin er hönnuð af Vodafone Group í takt við stefnu fyrirtækisins. En þegar við komum að borðinu með hugmynd um að opna verslun með kaffihúsi þá höfðu stjórnendur breska fyrirtækisins miklar efasemdir um áformin og spurðu hvernig við ætluðum að útfæra þetta. Svo fórum við að vinna þetta saman og nú eru þeir mjög spenntir fyrir því hvernig þetta muni tvinnast saman og opnir fyrir því að nýta þessa hugmynd víðar.“

Stefnt er að opnun verslunarinnar á Glerártorgi í júní en áform Vodafone Group eru að sögn Björns á frumstigi.

„Þeir eru á öðru tímabelti en við í fleiri skilningi en einum og verslanirnar eru jú um 2.500 talsins en hér eru þær fjórar. Þetta gerist því á öðrum hraða en hér á Íslandi. Við byrjuðum í febrúar að hugsa málið og erum núna komin á það stig að það verði opnuð búð í júní, en þeir gefa sér örugglega sex til níu mánuði bara í að velta hugmyndinni fyrir sér.“

Björn segir líklegt að samstarf fyrirtækisins og Tes og kaffis nái einnig til annarra verslana Vodafone á Íslandi.

„Við erum nú þegar með lítið kaffihorn í versluninni í Skútuvogi en það er með öðruvísi sniði. En það er klárlega möguleiki að útvíkka þetta ef vel gengur enda fellur þetta mjög vel saman.“