FÍ kaupir gamla DV-húsið í Þverholti

Gengið hefur verið frá kaupum FÍ fasteignafélags slhf. á gamla DV húsinu í Þverholti 11 í Reykjavík, að því er fram kemur í tilkynningu til Kauphallar. Listaháskóli Íslands er með húsið á leigu og er þar með aðalskrifstofu og kennslu í hönnun og arkitektúr.

Seljandi hússins er félagið Þ11 ehf. Kaupverð er ekki gefið upp, en samkvæmt heimildum blaðsins er líklega ekki fjarri brunabótamati hússins, sem hljóðar upp á rúmar 748 milljónir króna.

Í tilkynningu FÍ fasteignafélags slhf., sem er að stærstum hluta í eigu MP banka, kemur fram að með kaupunum aukist leigutekjur og rekstrarhagnaður fyrir fjármagnsliði og afskriftir (EBITDA) hjá félagsinu yfir 40 prósent á ársgrundvelli.

Örn V. Kjartansson, framkvæmdastjóri FÍ, segir félagið líta á Listaháskólann sem leigutaka til næstu átta til tíu ára, en skólinn er með langtímasamning um leigu á húseigninni.

„Við erum með fjárfestingarstefnu þar sem við leitum að vel staðsettu atvinnuhúsnæði á miðsvæði borgarinnar og það uppfyllir eignin vel. Þá er þessi fasteign á mjög vaxandi svæði nálægt miðsvæðinu,“ segir Örn.

Mikil uppbygging eigi sér stað allt í kring og verið að byggja fjölda íbúða. „Þarna er verið að breyta því sem eftir er af þessu elsta íbúðarhúsnæði í kring í íbúðir og svona til framtíðar litið þá teljum við að þetta sé staðsetning sem muni bara batna.“ 

Húsið sjálft segir Örn líka bjóða upp á margvíslega möguleika. Þannig mætti síðar breyta því aftur til fyrri hugmynda um notkun.

„Þessu var breytt 2006, 2007 í það að vera bæði skrifstofur og mögulega íbúðarhúsnæði á tveimur efstu hæðunum. Sá möguleiki er fyrir hendi ef svo bæri undir og gerir fjárfestinguna álitlega.“

Þ11 er samkvæmt gögnum lánstraust í jafnri eigu þriggja félaga. SV50 ehf, sem er í eigu Bjarka Brynjarssonar, 23 ára gamals fjárfestis; Glámu/Kíms ehf., sem er í eigu fimm eigenda Arkitekta Laugavegi 164 ehf; og ANS ehf. sem er eignarhaldsfélag Ívars Þórs Þórissonar og Ólafs Steinars Haukssonar.

DV-húsið hefur breyst í gegn um tíðina

Þverholt 11 var byggt 1984 fyrir Frjálsa fjölmiðlun, sem þá var útgáfufyrirtæki DV, Vikunnar og Úrvals. Hér til hliðar getur að líta forsíðu DV í nóvemberbyrjun 1985 þegar rifið var gamla húsið sem hýsti afgreiðslu DV og smáauglýsingar og byggingin fékk þá ásýnd sem hún hefur haldið að mestu til dagsins í dag, utan að hvítur litur hefur verið látinn víkja fyrir gráum og hæðum hefur fjölgað. DV var til húsa í Þverholti allt til ársins 2002, en síðan hefur húsið gengið kaupum og sölum nokkrum sinnum. Hanza-Hópurinn réðist í breytingar á húsinu fyrir hrun og stofnaði félagið Þverholt 11 ehf. í kring um framkvæmdirnar.