Hávaxni fatahönnuðurinn sem sigraði rokkarahjartað

L’Wren Scott fannst látin á heimili sínu í New York á mánudaginn. Hún var unnusta rokkarans Micks Jagger, farsæl fyrirsæta og fatahönnuður.

Scott er talin hafa svipt sig lífi á heimili sínu aðeins 49 ára gömul.  Jagger var staddur á tónleikaferðlagi í Ástralíu þegar hún lést en því hefur nú verið frestað.

Scott hóf feril sinn ung sem fyrirsæta en hún var mjög hávaxin, um 191 cm á hæð. Hún vann fyrir þekkt nöfn á borð við Herb Ritz og Karl Lagerfeld. Eftir að þeim ferli lauk fór hún út í búningahönnun og sá meðal annars um búninga í myndum á borð við Eyes Wide Shut og Ocean‘s Eleven.

Scott gerði einnig garðinn frægan sem stílisti stjarnanna og er talin vera sú sem sá til þess að leikkonan Nicole Kidman hlaut lof fyrir klæðaburð á rauða dreglinum.

Árið 2006 kom fyrsta fatalína Scott út og setti hún strax sitt mark á tískuheiminn. Stíll hennar þótti fágaður og tókst henni að fanga og undirstrika kvenlegar línur vel í hönnun sinni. Margar stjörnur voru aðdáendur fatnaðar Scott svo sem Amy Adams, Sandra Bullock, Michelle Obama, Jennifer Lopez og Madonna.

Síðasta sýning Scott var í London í fyrra en fyrirtæki hennar var í einhverjum fjárhagsörðugleikum sem getur hugsanlega útskýrt vanlíðan hennar.

Sýningu hennar á tískuvikunni í London í febrúar var frestað. Einnig hafa slúðurmiðlar vestanhafs velt því upp að Jagger hafi sagt Scott upp á dögunum en talsmaður söngvarans vísar þeim sögusögnum alfarið á bug. Þau voru búin að vera par síðan árið 2001.

Tískuheimurinn syrgir Scott en andlátið þykir minna á fatahönnuðinn Alexander McQueen sem svipti sig lífi árið 2010.

Hér má sjá L´Wren Scott er hún tók þátt sem dómari í vinsæla raunveruleikaþætti fyrirsætunnar Heidi Klum, Project Runway. 

L‘wren Scott er talin hafa fangað línur kvenlíkamans vel í hönnun sinni og hefur fatamerki hennar notið vinsælda.