Viðskipti innlent

Lýður og Bjarnfreður dæmdir í fangelsi

Kolbeinn Tumi Daðason skrifar
Bjarnfreður (t.v.) og Lýður.
Bjarnfreður (t.v.) og Lýður. Vísir/Vilhelm
Lýður Guðmundsson var í Hæstrétti í dag dæmdur í átta mánaða fangelsi fyrir brot á lögum um hlutafélög. Bjarnfreður H. Ólafsson hlaut sex mánaða fangelsi fyrir samskonar brot á sömu lögum.

Fullnustu fimm mánaða af refsingu Lýðs var frestað skilorðsbundið til tveggja ára. Fullnustu þriggja mánaða af dómi Bjarnfreðs var frestað skilorðsbundið í tvö ár. Hæstiréttur þyngdi dóma í héraði yfir bæði Lýð og Bjarnfreði.

Bjarnfreður var jafnframt sviptur réttindum sem héraðsdómslögmaður í eitt ár.

Lýður var í maí fyrir tæpu ári dæmdur í héraði til að greiða tveggja milljóna króna sekt vegna hlutafjáraukningar í Exista í lok árs 2008. Var minna en nafnverð greitt fyrir 50 milljarða nýrra hluta í félaginu. Hlutafé Existu var aukið um fimmtíu milljarða en aðeins greitt fyrir það einn milljarður króna í lok árs 2008. Ákæran var í tveimur liðum.

Lýður var einn ákærður í fyrri hluta ákærunnar, sem sneri að sjálfri hlutafjáraukningunni, og var sakfelldur fyrir þann lið. Bjarnfreður Ólafsson hæstaréttarlögmaður var ásamt Lýð ákærður í seinni hluta ákærunnar.

Sá liður sneri að því að senda ranga tilkynningu til Fyrirtækjaskrár. Þeir voru báðir sýknaðir fyrir þann lið í héraði.

Ólafur Þór Hauksson, sérstakur saksóknari, áfrýjaði málinu til Hæstaréttar sem felldi dóm sinn í dag. Hafði Ólafur krafist átján mánaða fangelsisdóms yfir Lýði en sex til átta mánaða dóms yfir Bjarnfreði sem sendi tilkynninguna til Fyrirtækjaskrár.

Dóminn í heild sinni má lesa hér.


Tengdar fréttir

Gestur: Saksóknari og heilbrigð skynsemi urðu viðskila

"Einhvers staðar á leiðinni frá upphafi rannsóknar og að útgáfu ákæru urðu hinn ágæti saksóknari og heilbrigð skynsemi viðskila,“ sagði Gestur Jónsson, verjandi Lýðs Guðmundssonar, í málflutningsræðu sinni í Exista-málinu svokallaða í Héraðsdómi Reykjavíkur í morgun.

Lýður kannast ekki við varnaðarorð Deloitte

Lýður Guðmundsson, fyrrverandi stjórnarformaður Existu, kannast ekki við það að endurskoðandi félagsins hjá Deloitte hafi tjáð honum að 50 milljarða hlutafjáraukning Existu stæðist ekki lög og Deloitte gæti aldrei skrifað upp á hana. Hann sagðist fyrir dómi fyrr í morgun ekki muna til þess að það hafi komið fram í símtali hans og endurskoðandans Hilmars Alfreðssonar.

Lýður Guðmundsson greiðir tvær milljónir í sekt - Bjarnfreður sýknaður

Lýður Guðmundsson, fyrrverandi stjórnarformaður Exista, var í dag dæmdur til að greiða tveggja milljóna króna sekt vegna hlutafjáraukningar í Exista í lok árs 2008. Ákæran var í tveimur liðum. Lýður var einn ákærður í fyrri hluta ákærunnar og var sakfelldur fyrir þann lið. Bjarnfreður Ólafsson, hæstaréttarlögmaður, var ásamt Lýð ákærður í seinni hluta ákærunnar. Þeir voru báðir sýknaðir fyrir þann lið. Ólafur Þ. Hauksson, sem flutti málið af hálfu ákæruvaldsins, segir að nú verði farið yfir forsendur dómsins og ríkissaksóknari muni svo taka ákvörðun um það hvort málinu verði áfrýjað.

Bjarnfreður var fullur efasemda

Bjarnfreður Ólafsson, lögfræðingur á Logos, segir að hann og aðrir starfsmenn Logos hafa verið fulla efasemda um að það mundi standast að greiða einungis einn milljarð fyrir 50 milljarða hlutafjáraukningu í Existu, eins og Lýður og Ágúst Guðmundssynir gerðu í desember 2008.

Segir Fyrirtækjaskrá hafa verið blekkta

Forstöðumaður Fyrirtækjaskrár viðurkennir að ólöglærður starfsmaður hafi gert mistök þegar 50 milljarða hlutafjáraukning Existu var samþykkt í desember 2008. Hins vegar hafi Fyrirtækjaskráin vísvitandi verið blekkt með villandi tilkynningu.

Töldu öll Deloitte hafa vottað viðskiptin

Fyrri degi aðalmeðferðar í Exista-máli sérstaks saksóknara er nú lokið. Vitnaleiðslum verður fram haldið í fyrramálið og að því loknu tekur málflutningur saksóknara og verjenda við.



Mest lesið


Fleiri fréttir

Sjá meira


×

Mest lesið