Umfjöllun, viðtöl og myndir: Stjarnan - ÍBV 22-24 | Dramatískur sigur ÍBV

ÍBV tryggði sér sæti í 8-liða úrslitum Coca-Cola bikarsins í handbolta þegar liðið vann Stjörnuna í Mýrinni í dag. Eyjastúlkur unnu seiglusigur eftir jafnan og hrikalega spennandi leik, allt fram á síðustu mínútu leiksins.

Bæði lið gerðu nóg af mistökum og kostuðu boltanum í gríð og erg útaf og í hendur andstæðinga. Einnig gerðust bæði lið sek um mörg sóknarbrot, en á endanum var það ÍBV sem gerði færri mistök og vann með tveggja marka mun, 22-24.

Stjarnan byrjaði leikinn af fullum krafti og komst meðal annars í 3-0 og 7-4. Þegar rúmar tíu mínútur voru liðnar var staðan orðin 9-5, en þá var þjálfurum Eyjastúlkna nóg boðið og þeir tóku leikhlé. Eftir það skánaði leikurinn til muna, en þær voru að skjóta afar illa á Florentinu Stanciu sem varði hvern boltann á fætur öðrum.

Gestirnir söxuðu hægt og rólega á forystu heimastúlkna og Telma Silva Amado jafnaði svo metin með einu af sex mörkum sínum í fyrri hálfleik. Staðan 10-10 þegar átján mínútur voru liðnar. Heimastúlkur reyndust svo ögn sterkari undir lok fyrri hálfleiks, en bæði lið voru að gera ótal mistök í sínum sóknarleik. Staðan 14-12 fyrir Garðarbæjarliðinu í hálfleik.

Báðir markverðir höfðu verið að verja vel í fyrri hálfleik, en Florentina Stanciu var með 45% markvörslu í fyrri hálfleik. Hinu megin í marki ÍBV var Dröfn Haraldsdóttir með 36%. Telma Silva Amado var kominn með helming marka ÍBV í fyrri hálfleik eða sex talsins.

Síðari hálfleikurinn einkenndist af mikilli baráttu enda sæti í 8-liða úrslitum bikarsins í boði. Heimastúlkur skoruðu fyrstu tvö mörkin í síðari hálfleik og virtust ætla vera sigla þessum leik þægilega í hús. Eyjastúlkur breyttu hins vegar stöðunni úr 16-12 í 16-16 og við vorum enn með leik í Mýrinni.

Næstu mínútur voru jafnar og leikurinn var jafn og spennandi. Staðan var jöfn, en þá skellti Florentina í lás og heimastúlkur skoruðu úr hraðaupphlaupum. Þær breyttu stöðunni úr 18-18 í 21-18 en gestirnir neituðu enn og aftur að gefast upp og jöfnuðu í 21-21.

Það voru svo gestirnir frá Vestmanaeyjum sem unnu að lokum nauman sigur eftir dramatískar lokamínútur. Á endanum gerðu þær færri mistök sem urðu þess valdandi að liðið er búið að tryggja sig í 8-liða úrslitin. Algjör seigla undir lokin, en lokatölur 22-24.

Telma Silva Amado var frábær í liði ÍBV, en hún skoraði átta mörk úr jafnmörgum skotum. Hornamaðurinn ungi Díana Dögg Magnúsdóttir spilaði afar vel í horninu og Dröfn Haraldsdóttir stóð sig vel í markinu.

Florentina Stanciu var í svakalegum ham í markinu hjá Stjörnunni og varði 43% skota sem á hana komu. Helena Rut Örvasdóttir var svo markahæst með sjö mörk, en hún skaut alls tólf sinnum.

Jón Gunnlaugur: Viljum fá Gróttu eða Fram á heimavelli

„Þetta var heldur betur frábær sigur. Þetta var kannski smá þjófnaður, en við komumst í fyrsta skipti yfir þegar fjórar mínútur voru eftir. Það sýnir karakter að geta gert þetta svona," sagði Jón Gunnlaugur, betur þekktur sem Gulli þjálfari ÍBV, við Vísi í leikslok.

„Stelpurnar ætluðu sér sigur og það tókst. Ég verð að hrósa þeim í hástert bæði fyrir stuðninginn af bekknum og hvernig þær höguðu sér inná vellinum. Virkilega fagmennlega gert."

„Mér fannst liðið spila vel í heild. Við lögðum leikinn vel upp og þegar vörnin small þá var þetta ekki spurning um hvort við myndum vera inn í leiknum, þær voru ekkert að fara valta yfir okkur. Ég er ánægður með það og skynsemina í sókninni."

Aðspurður hvort hann hafi verið hræddur þegar Stjarnan var kominn þremur mörkum yfir á tímapunkti í síðari hálfleik svaraði Gulli kokhraustur: „Aldrei!," sem fór næst beint í sálfræði-bunkann.

„Við vonum núna að við fáum Gróttu eða Fram á heimavelli. Ég held að það sé okkar möguleiki að fá eitthvað sterkt lið á heimavelli til þess að eiga þá auðveldara andstæðing ef við förum áfram í því," sagði Gulli í leikslok.

Ragnar: Töpum þessu á hreinum aumingjaskap

„Það er mjög einfalt hvað fór úrskeiðis. Þetta er sjötti leikurinn sem ég sé þetta lið spila á tveimur árum þar sem liðið er með unnin leik, en þora ekki að vinna hann og tapa hann á hreinum aumingjaskap," sagði Ragnar Hermannsson, þjálfari Stjörnunnar, brjálaður í samtali við Vísi í leikslok.

„Það var bara farið að horfa um öxl í lykilstöðum í síðari hálfleik. Við erum með 22 tæknifeila og hugleysið í ákveðnum stöðum er þannig að maður veit ekki hvað er að gerast."

„Við erum að búa til klassa stöður, við erum að spila klassa vörn og stelpurnar eru að leggja sig 110% fram. Það vantar ekkert uppá það. Við erum að halda liðið sem er að skora 30 mörk að meðaltali í deildinni í 24 mörkum, en þegar það kemur að lokastöðunum þá er engin sem þorir."

„Við förum heldur betur inn í skelina. Ég held við skorum eitt mark síðustu tíu eða tólf mínútunum og það er úr eitthverju neyðarskoti þegar leikurinn er nánast búinn."

„Ég er hrikalega ósáttur. Ekki við stelpurnar hvernig þær spiluðu leikinn, heldur þetta andlega mein sem er að trufla okkur núna. Það var að trufla okkur í fimmta leik gegn Val í fyrra, fjórða leik gegn Val í fyrra, öðrum leik gegn Val í fyrra.

„Við vorum einnig góða stöðu í bikarúrslitaleik í fyrra og köstum því frá okkur. Þetta er að endurtaka sig aftur og aftur og ef okkur tekst ekki að leysa þetta þá verðum við alltaf bara eitthver silfurskeið."

„Það er bara deildin núna og við eigum langt í land sérstaklega með þessi atriði sem ég er að tala um," sagði Ragnar hundfúll í leikslok.