App Dynamic flytur upp á nítjándu hæð Turnsins

Íslenska hugbúnaðarfyrirtækið App Dynamic hefur samið við Eik fasteignafélag um leigu á hluta nítjándu hæðar Turnsins í Kópavogi þar sem veitingastaðurinn Turninn nítjánda var áður.

„Fyrirtækið er að stækka og húsnæðið mun gera okkur kleift að bæta við starfsfólki,“ segir Pratik Kumar, framkvæmdastjóri og stofnandi App Dynamic.

Fyrirtækið var stofnað árið 2011 og hefur síðan þá þróað ýmis snjallforrit fyrir vefverslun Apple, App Store. Vinsælasta vara fyrirtækisins heitir AirServer en um ein og hálf milljón manna notar forritið á hverjum degi. Það gerir notendum kleift að streyma tónlist, myndbönd eða öðru efni úr Apple og PC-tölvum í þráðlaus tæki sem nota iOS-stýrikerfi Apple, eins og Ipad og Iphone. Einnig er hægt að snúa dæminu við og skoða gögn úr spjaldtölvum og símum Apple í hefðbundnum tölvum.

AirServer hefur fengið jákvæða umfjöllun í erlendum miðlum á borð við Wall Street Journal, Macworld og Wired. Netmiðillinn TUAW, sem fjallar um vörur og forrit fyrir tæki Apple, valdi nýjustu útgáfu hugbúnaðarins, AirServer 5.0, sem eitt af tíu bestu snjallforritum síðasta árs. Bandarísku háskólarnir MIT, Harvard og Stanford eru að sögn Pratiks á meðal viðskiptavina fyrirtækisins.

„Við erum enn að þróa vörur fyrir Apple en AirServer er nú okkar langvinsælasta vara en það er forrit sem þarf að greiða sérstaklega fyrir og er ekki selt í vefverslun Apple. Vinsældirnar eru slíkar að við þurfum nú að stækka og nú höfum við pláss til að bæta við fólki.“

Tólf manns starfa nú á skrifstofu fyrirtækisins í Hlíðarsmára í Kópavogi en stefnt er að flutningum í Turninn fyrir maílok.

„Við höfum auglýst eftir fólki í dagblöðum en við erum mjög kröfuhörð enda er þetta mjög flókin tækni. Við þurfum mjög hæfa forritara en því miður höfum við verið í vandræðum með að finna þá hér á landi,“ segir Pratik.