Ég bið þig Ísland, að ganga í ESB

Fyrir stuttu lauk árlegum fundi Norðurlandaráðs í Ósló. Svíþjóð, Noregur, Finnland, Ísland og Danmörk og sjálfsstjórnarsvæðin hittust, eins og vant er, til að vinna að áframhaldandi norrænu samstarfi. Út frá sameiginlegri sögu/fortíð leggjum við grunninn að sameiginlegri framtíð.

Lönd okkar hafa sameinaða rödd á alþjóðlegum vettvangi. Við mætumst með það að markmiði að viðhalda sterkum velferðarríkjum með opnum útflutningsmiðuðum hagkerfum. Við erum talsmenn jafnréttis, hreinskilni og umburðarlyndis. Þegar Svíþjóð nýlega tók á móti Obama forseta í hans opinberu heimsókn þótti okkur ekkert annað en sjálfsagt að Sigmundur Davíð Gunnlaugsson forsætisráðherra myndi einnig vera viðstaddur og fá tækifæri til að tala fyrir hönd Íslands.

Okkar norræna rödd getur orðið sterkari því fleiri sem sameiginlegir snertifletir okkar verða. Metnaður minn og margra annarra Svía er að Svíþjóð muni eins fljótt og auðið er ganga í NATO og ósk mín, sem og margra annarra Svía, er að eins fljótt og auðið er muni Ísland og einnig Noregur, verða aðilar að Evrópusambandinu. Þó er það svo að aðeins Íslendingar sjálfir geta ákveðið hvort aðildarviðræðum verði haldið áfram. Svíþjóð og sænskir stjórnmálamenn geta ekki gert annað en að standa hjá og vonast til að geta greitt Íslendingum leiðina til Brussel. Og Svíar hafa góða ástæðu til að vona:

- Aðild Íslands að ESB myndi styrkja hina norrænu rödd í Evrópu. Til að mynda með eigin framkvæmdastjóra, atkvæði i ráðherraráðinu og fleiri norrænum sætum á Evrópuþinginu.

- Aðild Íslands að ESB myndi styrkja Atlantshafstengslin enn frekar. Ykkar framúrskarandi samband við Kanada myndi bæta enn frekar hið verðandi samstarf milli ESB og Kanada sem nú myndast með fríverslunarsamningnum milli þessara tveggja aðila.

- Aðild Íslands að ESB myndi ljúka stækkun ESB í norðvesturátt. Nú þegar evrópskt samstarf vex í austur, sem er sannarlega jákvæð þróun, er það jafnframt mikilvægt að norðvesturhluti sambandsins haldi áfram að gegna stóru hlutverki.

Ég hef mikinn skilning á að sigrast þurfi á mörgum áskorunum ætli Ísland að gerast meðlimur í Evrópusambandinu. Þó er ég viss um að þetta séu áskoranir sem hægt er að sigrast á í sameiningu. Með EES-samningnum ættu nýjar samningaviðræður að geta hafist tafarlaust á ný og á áhrifaríkan hátt. Svíþjóð mun standa með ykkur. Þannig birtast tengsl bræðraþjóða.

Í maí á næsta ári eru kosningar til Evrópuþingsins. Þar kem ég til með að vera fulltrúi frjálslyndra gilda og hins norræna samfélagslíkans. Þegar sá dagur kemur að Ísland ákveður að taka fullan þátt í hinu evrópska samstarfi þá mun ég standa með hagsmunum ykkar í Brussel. Sem Norðurlandabúar eigum við hjálpast að og styðja hverjir aðra. Þau skilaboð sem ég er að reyna að koma á framfæri eru að ávinningurinn fyrir okkur öll er of stór til þess að láta kyrrt liggja: Ég bið þig Ísland, að ganga í ESB.