Stjórnvöld hvött til að hafna Landsbankasamningnum

Bjarni Benediktsson fjármálaráðherra segir að ríkisstjórnin muni ekki leggja blessun sína yfir Landsbankasamninginn ef að hann hefur neikvæð áhrif á áætlun um afnám gjaldeyrishafta. Heiðar Már Guðjónsson fjárfestir hvetur stjórnvöld til að hafna samningnum. Nýi og gamli Landsbankinn sömdu í síðustu viku um lengingu á rúmlega 220 milljarða skuldabréfa. Lokagreiðslan á nú að fara fram í október 2026 í stað október 2018.

Heiðar Guðjónsson fjárfestir gagnrýnir þennan samninginn í grein í Morgunblaðinu í dag og hvetur stjórnvöld til að hafna honum. Heiðar sakar Landsbankana um villandi framsetningu á samningnum og segir að hann muni ekki auðvelda stjórnvöldum að afnema gjaldeyrishöftin. Heiðar segir einnig að það sé engin lausn á skuldavandanum að framlengja hann á hærri vöxtum.

Helgi Hjörvar, þingmaður Samfylkingarinnar, tók málið upp á Alþingi í dag og spurði um afstöðu Bjarna Benediktssonar fjármálaráðherra til málsins.

„Fram er komin í morgun áskorun frá einum umsvifamesta fjárfesti landsins á fjármálaráðherra og Seðlabankann að leggjast gegn þessari skilmálabreytingu,“ sagði Helgi.

„Ég spyr því hæstvirtan fjármálaráðherra um afstöðu hans til skilmálabreytingarinnar og þá sömuleiðis hvort að stjórnarflokkarnir séu samstíga í þeirri afstöðu og um leið hvers vegna skilmálabreytingin hafi ekki verið rædd á þeim samráðsvettvangi sem stjórnmálaflokkarnir sammæltust um að skildi vera um þær meiriháttar ákvarðanir sem varða losun gjaldeyrishafta.“

Ráðherra sagði að fjármálaráðuneytið hafi ekki komið að gerð þessa samnings og því væri ekki búið fjalla um hann í samráðshóp um afnám gjaldeyrishafta.

„Hins vegar ber að athuga það að nýja Landsbankanum er hvenær sem er heimilt að greiða þetta lán upp að fullu, fái hann betri kjör annarsstaðar,“ svaraði Bjarni.

„Að öðru leyti get ég ekki tjáð mig um það hversu hagstætt eða óhagstætt það er fyrir bankann að búa við þau kjör sem þarna er um að ræða. Aðalatriðið er það að þegar það kemur að ákvörðunum sem snúa að því hvernig við tökum skref í átt að afnámi hafta, sé hvert og eitt skref í takt við ákveðna heildaráætlun. Það verður verkefni okkar í framhaldinu, að tryggja að það verði engar ákvarðanir teknar í þessu máli sem gera okkur erfiðara fyrir með síðari stig málsins, hvað varðar afnám gjaldeyrishafta.“